KellyChu - 有發音如廣東話「讀歪小小」議員上京「港普」發言夏寶龍笑勸惡補 | Executive日記

更新時間：02:00 2026-08-11 HKT
發佈時間：02:00 2026-08-11 HKT

88名立法會議員上月19至25日歷史性赴京參加研修班，在結束行程前一天，獲港澳辦主任夏寶龍接見詳談5小時。據聞在該次高規格閉門會談中，發生咗一段「小插曲」，由於不少議員嘅普通話都講得唔太標準，以至夏寶龍忍唔住鼓勵大家要學好普通話。多名議員認為，夏主任只係提醒一下，並非責怪，不過部分同僚嘅「港式普通話」又係真非粵語使用者都幾難聽得明。

　　成日有人笑香港人嘅普通話係「港普」，引用蔡少芬、古天樂等知名藝人嘅普通話發言揶揄。小妹都要公道講句，香港人平日生活裏真係較少用到普通話，所以唔多機會練習，自然講得冇咁好。之不過，作為代議士嘅立法會議員，經常要到內地考察、接觸中央政府官員，講好普通話有助雙方順利溝通，都咪話唔重要。

　　據聞喺同夏寶龍會談期間，不少議員發言時嘅普通話都頗為「普通」，更有個別議員發音猶如廣東話「讀歪小小」。夏寶龍亦因此忍不住鼓勵一眾議員要學好普通話，笑言大家上到北京，冇理由反而要佢學習好廣東話。多名議員都認為，夏寶龍此番話並無責怪意味，只是以開玩笑的方式提醒議員努力學習。

　　有代議士則指，一眾同僚係「精挑細選」嘅愛國者，冇理由「普通話都講成咁」，加上喺愛國者治港下，少不免與內地官員接觸，議員們應自覺努力提升好普通話水平。而喺內地長大嘅民建聯立法會議員陳勇坦言，整體議員嘅普通話水平在溝通上肯定沒問題，只係部分帶有港式普通話風格，相信領導人肯定聽得明白，而且一聽開口就知道是來自香港特區。Kelly希望各位議員日後多加練習，做個好榜樣喇。

KellyChu

↓追蹤《星島頭條》WhatsApp頻道↓