港人食$1500壽喜燒放題貨不對辦？被店員無禮提早催趕離場兼斥「唔識煮嘢食」網民：貼錢買難受

更新時間：17:21 2026-08-10 HKT
發佈時間：17:21 2026-08-10 HKT

與好友外出用餐慶祝生日，本是一件開心事，如果用餐期間遇到不愉快經歷，確實會大為掃興。最近，有港人於網上平台大吐苦水，透露早前與友人到銅鑼灣一間壽喜燒放題花費逾$1,500，卻換來「一肚氣」的體驗。二人原來選擇150分鐘套餐，但至90分鐘便被侍應熄燈催趕，加上用膳期間發生1事，竟被侍應斥責「你哋唔識煮嘢食？」網民一面倒同情事主的遭遇，批評侍應無禮對待：「貼錢買難受。」

150分鐘放題疑變90分鐘最後落單時間熄燈提早趕客

有食客近日於網上社交平台發文，表示為與友人慶祝生日，預訂下午1:30到銅鑼灣一間壽喜燒放題，並選擇了用餐時間為150分鐘的「Plan 4」套餐，按其入座時間及落單系統顯示至少可享用至下午4:00，事主亦強調入座前店員曾向他們表示「15:00會Last order」。然而，當踏入下午3:00時，樓主發現不能再落單之餘，現場自取區的食物、飲品、甜品、雪糕均會停止供應並熄燈。事主憶述下午3:08獲店員通知他們最遲下午3:15要離開，二人即提出按他們已預訂的套餐限時為150分鐘，「係去到16:00，入座前只係講15:00 Last order，無提及過我哋最遲15:15要離場」，更質疑還未享用最後落單的食物，同時要求他們立即提早離開的做法，「即係要提前45分鐘離開？」

當事主提出疑問後，獲店員反問一句：「咁你哋想坐到幾點啊？」，事主形容對方口吻似乎責怪他們，即使店員之間亦不停控訴指責及討論二人，「言談之間覺得間舖只剩返我哋，覺得我哋阻住佢哋」，令他們感到被針對。

燒燶鍋底遭侍應指責「唔識煮嘢食」

除了提早被催趕離場之外，事主於用餐期間遭受的對待，更令她形容「令我哋大開眼界」。二人入座後不久，有店員為他們打開爐具並倒入少量壽喜燒汁，他們亦開始燒肉，惟煲底極速燒燶。店員立即上前處理，同時向事主表示：「你哋唔識煮嘢食㗎？搞到咁大陣味！」二人見狀即時道歉，店員亦為他們豁免「今次換煲嘅$50」。惟店員收走鍋具後，二人聽到其他店員私下討論認為要收取$50，「個煲好難洗㗎！」，事主形容當時不只3位店員於背後大聲指責及注視他們，「我們道歉後1小時仍持續聽到店員話個煲好難洗」。

事主不堪受到閒言閒語加上「越食越嬲」，她更特地下樓到便利店找換一張$50給店員，以「支付」換煲費，「當$50買個知情權」。事主坦言明白自己有錯在先，如店員一開始按條款細則收取$50，「我哋絕對會立即支付，絕對唔會比機會佢哋覺得我哋唔肯賠錢，亦唔會比機會佢哋不禮貌對待我哋一小時，亦唔會選擇Plan 4共150分鐘」。

網民怒轟服務態度：貼錢買難受

對於事主不愉快的用餐經歷，大多網民對其遭遇感到同情，同時批評餐廳的處理手法，有網民認為店員應該於入座前清楚提及關門時間：「餐飯$1500，明明可以食2個半鐘，變咗淨係食個幾鐘，係我就嬲到癲咗即場嘈佢」、「真心癲，少咗40%時間仲要俾足$1500！樓主真係斯文人，我當刻就肯定發火，唔會照俾」、「唔想你阻住佢收工，根本唔應該賣150分鐘plan俾你」、「如果唔足時間，入座前應該講明，冇理由食到一半先同人講」、「明知自己有落場，就同客講13:30只可以食90分鐘，俾人揀150分鐘又趕人走，我未食夠同佢講收一半錢又得唔得？」、「13:36打飛，人客揀plan3 or plan4都應該要食到120/150分鐘，你要15:00落場要人客直頭離開，你唔入座時講？」

有人指出樓主應該要早知餐廳的落場時間，從而自己決定預訂時間，否則未能盡用餐時間：「本身間嘢營業時間到15:30，15:15趕你走又有點那個，但唔係奉旨營業時間外比你坐夠時間」、「店舖收15:15你應該早知，你自己應該book 12:30入場，book plan 4 150分鐘即係15:00離場才正常」，事主回覆補充餐廳可供最遲預訂時間為13:30，「我哋係唔知道收15:15的，望到佢最後可以選擇時間去到13:30，如果咁嘅價錢，我會expect佢提前同我講13:30呢場係唔滿150分鐘。」

文：RY
資料及圖片來源：Threads