KellyChu - 8‧22開打 全力以赴「衝金」 全運會保齡球群眾賽 退役港將「出山」 | Executive日記
KellyChu
2025-08-12 02:00 HKT
字體大小
俗語有云：「七年之癢」，正是幾名前港隊保齡球隊成員嘅心聲。時隔7年，佢哋再披戰衣，重返賽場，有講有笑，為參加全運會而感到興奮，Kelly就知道佢哋係由衷熱愛保齡球。今屆全運會初次舉辦嘅保齡球群眾比賽，香港派出9位退役港隊同1位現役青年隊成員參賽，將於本月22至24日喺啟德體育園保齡球中心正式開打。成員如今有新身份，正職之餘要抽時間練習，但記起昔日美好回憶，依然希望能夠奪冠，踏上頒獎台，相當熱血！
時過境遷，各成員如今紛紛有新身份，有人升級做父母，有人轉換跑道，但憑藉昔日對保齡球嘅熱愛，毅然決定重返球場，於95支隊伍中脫穎而出。退役多年，身體狀況大不如前，要發揮以往十成功力都唔容易，為咗搵番手感，隊員每個禮拜練習兩次。不過前港隊代表甘兆麟同李詠茵坦言大家身兼數職，要專注練習，實在有啲難度。
除咗身體變化，身份上嘅轉變亦要時間適應。卸下港隊之名，各人事事要親力親為，但甘兆麟同李詠茵就覺得以前背負港隊身份，比賽壓力好大，如今身份轉變，反而感受到唔同角色嘅支持，反映群眾賽事嘅重要性。佢哋仲話，即使只係講句加油，喺社交媒體轉發比賽消息，都係一種打氣同鼓舞，令佢哋更加投入比賽。
你話佢哋仲想贏？係啊！李詠茵直言「想攞金牌」，踏上頒獎台。而甘兆麟亦點名想同遼寧省選手王智勇切磋，話以前與同為正手球員王智勇交過手，知道對方有料。不過計Kelly話，無論最後有無獎牌，佢哋付諸行動，重拾自己熱愛嘅運動嗰下已經贏咗，等我哋一齊為香港健兒打氣啦！
KellyChu
最Hit
更多文章
