演《法言人》太投入輕佻角色黃嘉樂Cut機Keep住玩被投訴

頭條日報-娛樂

更新時間：00:00 2023-05-11 HKT
發佈時間：00:00 2023-05-11 HKT

劇集《法言人》是黃嘉樂在TVB的尾二套作品，劇中飾演富二代律師Will，性格輕佻有趣，不過，由於角色跟真人性格反差太大，嘉樂自爆為投入，戲內戲外keep住high energy，點知被劇組誤會做事唔認真玩玩吓，搞到要向監製道歉及解釋，好彩最後都明白晒，小事化無。
採訪：方騫平場地：ZENG@登龍街

黃嘉樂在《法言人》中初次挑戰男主角，跟馬國明、林夏薇、張頴康情如兄妹，玩得好夾。平日內向的嘉樂為入戲，一反常態變得冇時停，就算cut咗機都主動撩對手傾偈，因此被唔同組別的導演誤會他玩得太犀利，工作唔認真，有日被監製捉住了解。

嘉樂形容接獲投訴感到好愕然：「雖然只係一場誤會，但可能自己過咗火位都唔知，而且跟導演唔係常合作，未必知道我為人係好慢熱，真係為咗keep住high energy先咁做，所以我都有向監製致歉，好彩監製同我合作咗好多年，較明白我。」除此之外，角色唔專一，用對白交代常「換畫」，現實中他就鍾情老婆江惠賢（Samantha），坦言已遇上心動嘅女人。

黃嘉樂回復自由身半年，笑言大家都怕他冇嘢做，故搵他拍劇及出啲社交媒體廣告，他開心說：「咁我都仲生活到，希望未來主攻內地市場，拍多啲古裝劇。」