佐敦食肆只收現金食客帶唔夠錢 豪氣老闆一句「XX」抵銷差額 港男大尷尬轉頭咁報恩｜Juicy叮
發佈時間：11:18 2025-08-10 HKT
本港的好人好事又多一宗。有港男早前與同事到佐敦一家食肆午膳，埋單時卻發現只收現金，在唔夠錢找數的尷尬情兄下，老闆卻豪氣地拋出兩個字來抵銷差額。數還數，路還路，大受感動的港男轉頭即還錢，並做一事報恩。詳情見下圖及下文：
佐敦食肆只收現金食客帶唔夠錢 豪氣老闆一句「XX」抵銷差額 港男大尷尬轉頭咁樣做逐張睇↓↓↓↓
樓主唔夠錢找數：大鑊，點算？
樓主早前在社交平台Threads上載涉事單據發帖：
黐X線，香港點解會有呢啲老細，食完飯埋單，問坐喺收銀嘅老細：「除咗現金仲可以俾咩？」，老細話「淨係收現金」（有啲兇）， 即刻問幾個同事有冇現金，兩個同事都話冇，我喺銀包攞咗兩張$100出嚟，我心諗「大鑊，點算？」。
跟住老細一手搶咗兩張$100，跟住佢講句「得啦」。我呆咗，我話「點得呀？」，老細補多句「得啦」，咁我咪同佢講返，「我下次嚟俾返你」，老細話「唔好講呢啲」（有啲兇），喺香港生活嘅人都知，俾少1蚊都出唔到門口，活咗30幾年，真係未見過咁樣嘅老細。
樓主連隨再發帖和上載相片補充：「唔好意思，我無講清楚，寫呢個post（帖文）嘅角度，係想讚個老細，我寫實地寫出同老細嘅對話，完全冇貶義，老細係豪氣之人，又好人，又細心」、「做完嘢還返錢，請老細飲嘢，好人要有好報」。
單據顯示樓主3人共消費233元，老細一句「得啦」，直接豪氣抵銷了33元的差價。而樓主放工後，即帶同餘款和一罐啤酒到場還債和報恩。
網民：最好味都係人情味
回應的網民深有體會，精警地點出事件精髓「最好味都係人情味」。另有不少人大讚這位豪氣老細，指「呢個老細冇得頂」、
「祝老闆生意興隆工作順利」、「咁好嘅老闆，真係要多多幫襯，免得又少一間港色食肆」。
有人更加表示：「依啲老細通常做街坊生意多，以前去屋企樓下買嘢，都可以後尾補番」、「電子支付流行嘅情況下，我成日出現一係周身冇蚊，一係幾個月都用唔到500蚊cash（現金）。老細真心好人，你行去再去幫襯下啦。家下食肆真心難做」。
網民：粗聲粗氣又好親切 香港特色
接著有網民指出「好鍾意呢啲粗聲粗氣得嚟又好親切嘅對話，香港特色嚟」、「好多遊客（尤其是台灣人）都話香港人外冷內熱，可能呢個老闆都係！」。
有網民續稱，「其實好多小店老闆都係咁，講嘢粗粗魯魯俾人感覺冇禮貌。但其實骨子裏都係隨和，冇乜所謂。自己都試過唔記得帶錢或者唔夠現金，同老闆講聲佢哋都回應『轉頭返嚟俾返啦』，有時仲要串串地加多句『睇你個樣都唔似呃嗰幾十蚊』。可能有啲人會覺得『我係客，舖頭咁嘅語氣唔尊重客人』，但我自己就接受到呢一種市井式招待」。
相關閱讀：食74元叉鵝飯埋單200元免找 網民激讚天水圍無名英雄
網民分享類似經歷
在回應欄，不少網民順道分享類似的唔夠錢找數，但獲店家高度信任的窩心經歷：
•食完豆腐花加魚肉豆腐，消費咗50幾蚊，食完想俾錢因為淨係收現金，發覺銀包得返$10，姨姨好好，話出去慢慢再撳返返嚟啦唔緊要㗎，同一情況我試過兩次，感覺真係好窩心，佢哋信任我唔會爭佢哋錢走咗去唔返，慢慢再出去撳錢再還啦。咁當然我都真係極速跑出去撳錢再返嚟俾返錢。
•試過喺公司附近買兩餸飯，夾晒餸pack（包）好晒先發現無帶錢，遮遮（姐姐）竟然話唔緊要啦，你下次俾返就得，但係我平時好少買呢間，佢無可能認得我，我完全可以走咗去無下次，之後即時返公司攞錢，返轉頭找數。
•呢啲老細一流啦不拘小節！我喺加拿大買外賣，有間中餐買到熟咗，都知道佢哋生意難做通常我都俾現金，個老細而家通常都係唔收我零頭...大家開心。
資料來源：arborjason＠Threads
相關閱讀：唔夠錢埋單拒放下手機或小童 港女出外「撳機」斥被店員尾隨惹議↓↓↓↓
雖然電子支付已變得普遍，但是仍有部分餐廳只接受現金，因此在外用餐時，要帶備足夠現金，以免發生不愉快的事。有食客2022年在網上發文，指在上環一間餐廳用餐，並在結帳時發現沒有足夠現金，店方要求放下手機或同行小童再出外「撳機」。惟樓主未有聽從要求，並先帶同小孩到洗手間，卻發現被店員尾隨，令她甚為不滿。涉事餐廳負責人在回覆《星島頭條》查詢時強調，該名男職員善良，沒有恐嚇女事主。↓↓↓↓
