佐敦食肆只收现金食客带唔够钱 豪气老板一句「XX」抵销差额 港男大尴尬转头咁报恩｜Juicy叮
发布时间：11:18 2025-08-10 HKT
本港的好人好事又多一宗。有港男早前与同事到佐敦一家食肆午膳，埋单时却发现只收现金，在唔够钱找数的尴尬情兄下，老板却豪气地抛出两个字来抵销差额。数还数，路还路，大受感动的港男转头即还钱，并做一事报恩。详情见下图及下文：
佐敦食肆只收现金食客带唔够钱 豪气老板一句「XX」抵销差额 港男大尴尬转头咁样做逐张睇↓↓↓↓
楼主唔够钱找数：大镬，点算？
楼主早前在社交平台Threads上载涉事单据发帖：
黐X线，香港点解会有呢啲老细，食完饭埋单，问坐喺收银嘅老细：「除咗现金仲可以俾咩？」，老细话「净系收现金」（有啲凶）， 即刻问几个同事有冇现金，两个同事都话冇，我喺银包攞咗两张$100出嚟，我心谂「大镬，点算？」。
跟住老细一手抢咗两张$100，跟住佢讲句「得啦」。我呆咗，我话「点得呀？」，老细补多句「得啦」，咁我咪同佢讲返，「我下次嚟俾返你」，老细话「唔好讲呢啲」（有啲凶），喺香港生活嘅人都知，俾少1蚊都出唔到门口，活咗30几年，真系未见过咁样嘅老细。
楼主连随再发帖和上载相片补充：「唔好意思，我无讲清楚，写呢个post（帖文）嘅角度，系想赞个老细，我写实地写出同老细嘅对话，完全冇贬义，老细系豪气之人，又好人，又细心」、「做完嘢还返钱，请老细饮嘢，好人要有好报」。
单据显示楼主3人共消费233元，老细一句「得啦」，直接豪气抵销了33元的差价。而楼主放工后，即带同余款和一罐啤酒到场还债和报恩。
网民：最好味都系人情味
回应的网民深有体会，精警地点出事件精髓「最好味都系人情味」。另有不少人大赞这位豪气老细，指「呢个老细冇得顶」、
「祝老板生意兴隆工作顺利」、「咁好嘅老板，真系要多多帮衬，免得又少一间港色食肆」。
有人更加表示：「依啲老细通常做街坊生意多，以前去屋企楼下买嘢，都可以后尾补番」、「电子支付流行嘅情况下，我成日出现一系周身冇蚊，一系几个月都用唔到500蚊cash（现金）。老细真心好人，你行去再去帮衬下啦。家下食肆真心难做」。
网民：粗声粗气又好亲切 香港特色
接著有网民指出「好钟意呢啲粗声粗气得嚟又好亲切嘅对话，香港特色嚟」、「好多游客（尤其是台湾人）都话香港人外冷内热，可能呢个老板都系！」。
有网民续称，「其实好多小店老板都系咁，讲嘢粗粗鲁鲁俾人感觉冇礼貌。但其实骨子里都系随和，冇乜所谓。自己都试过唔记得带钱或者唔够现金，同老板讲声佢哋都回应『转头返嚟俾返啦』，有时仲要串串地加多句『睇你个样都唔似呃𠮶几十蚊』。可能有啲人会觉得『我系客，舖头咁嘅语气唔尊重客人』，但我自己就接受到呢一种市井式招待」。
相关阅读：食74元叉鹅饭埋单200元免找 网民激赞天水围无名英雄
网民分享类似经历
在回应栏，不少网民顺道分享类似的唔够钱找数，但获店家高度信任的窝心经历：
•食完豆腐花加鱼肉豆腐，消费咗50几蚊，食完想俾钱因为净系收现金，发觉银包得返$10，姨姨好好，话出去慢慢再揿返返嚟啦唔紧要㗎，同一情况我试过两次，感觉真系好窝心，佢哋信任我唔会争佢哋钱走咗去唔返，慢慢再出去揿钱再还啦。咁当然我都真系极速跑出去揿钱再返嚟俾返钱。
•试过喺公司附近买两餸饭，夹晒餸pack（包）好晒先发现无带钱，遮遮（姐姐）竟然话唔紧要啦，你下次俾返就得，但系我平时好少买呢间，佢无可能认得我，我完全可以走咗去无下次，之后即时返公司攞钱，返转头找数。
•呢啲老细一流啦不拘小节！我喺加拿大买外卖，有间中餐买到熟咗，都知道佢哋生意难做通常我都俾现金，个老细而家通常都系唔收我零头...大家开心。
资料来源：arborjason＠Threads
相关阅读：唔够钱埋单拒放下手机或小童 港女出外「揿机」斥被店员尾随惹议↓↓↓↓
虽然电子支付已变得普遍，但是仍有部分餐厅只接受现金，因此在外用餐时，要带备足够现金，以免发生不愉快的事。有食客2022年在网上发文，指在上环一间餐厅用餐，并在结帐时发现没有足够现金，店方要求放下手机或同行小童再出外「揿机」。惟楼主未有听从要求，并先带同小孩到洗手间，却发现被店员尾随，令她甚为不满。涉事餐厅负责人在回复《星岛头条》查询时强调，该名男职员善良，没有恐吓女事主。↓↓↓↓
