前亞姐袁潔儀罕談三度流產 懷胎4月引產膀胱撕裂大出血致不孕 曾欲勸前武警老公搵二奶
發佈時間：09:00 2025-07-13 HKT
人稱「潔儀姐姐」的90年代亞視兒童節目《精靈一族》主持的袁潔儀，在1989年參加《亞洲小姐競選》獲得第五名後加入亞視，其後成為力捧「十二星道」的其中一員，本來事業發展順利，不過在90年代後期因亞視自製劇減少，袁潔儀將工作重點放在主持《今日睇真D》。
袁潔儀曾三度流產自責建議老公「包二奶」
袁潔儀在2000年轉投TVB，不過發展仍然未如理想，結果在2009年離巢並北上工作，期間遇上曾任職武警、現為商人的內地男友，結婚在內地定居兼發展，直到近年間中返港工作。日前袁潔儀接受鍾慧冰的YouTube節目《冰姐的花樣人生》的訪問，袁潔儀曾三度流產自責，結果建議老公「包二奶」。
相關閱讀：58歲《宮心計2》女星罕受訪！一年前滿面皺紋現今狀態驚人 老公曾當武警現長居廣州
袁潔儀曾三度流產自責：
袁潔儀與老公是「姊弟戀」
袁潔儀在節目上提到與老公是「姊弟戀」，本來二人未有結婚打算：「嗰陣都好糾結，擔心自己老咗要佢照顧我，點知係天註定，我突然間有咗，老公話梗係生落嚟，咁我哋咪排期結婚，嗰陣我哋喺香港註冊，不過檢查嗰陣醫生話bb冇咗心跳，唔要得。」袁潔儀稱老公知道後，堅持要繼續結婚：「冇耐第二個同第三個都嚟咗，但係第二個都係一個月冇咗心跳，到有咗第三個，我咪乜嘢都唔做，專心養胎，連檢測都冇嚟香港，全部喺內地進行，本來順利度過三個月，點知驗出BB好大機會有唐氏綜合症，權衡輕重後，決定排期做流產，我以為係一痛就會自己流出嚟，點知半夜一點開始痛，仲叫老公唔好過嚟，以為好快搞掂。」
袁潔儀因流產導致膀胱撕裂不停出血
殊不知原來痛了很久，袁潔儀問醫護人員點解仍未流出來，他們竟然說：「你已經差唔多4個月，要好似生仔咁等佢自己出嚟，過咗半個鐘，我feel到啲羊水好似噴出嚟，咁咪諗係咪要好似隔離嗰個媽媽咁用力，我用咗一下就feel到有嘢出咗嚟，嗰陣我唔敢望，只係心諗『小朋友，我哋有緣再見喇。』」袁潔儀以為自己已經「搞掂」，但過了很久發現自己不停出血：「嗰個主任話係膀胱撕裂，要即刻推上去做手術，原來係我太大力搞到撕裂咗，自此之後我呢個子宮嘅環境跌到好低谷，就算我再重新去調整，都唔可以再懷孕。 本來老公堅持要我去調理，我心諗『不如你去搵二奶咪仲好』，但係最後我都冇講到出口，點知呢番說話喺ming姐（林建明）身上聽到。」袁潔儀老公曾找過代孕，不過因為生意很忙，最後打消了這念頭。
相關閱讀：《今日睇真D》女星素顏現火車軌！義氣照顧車禍破相女星 三度流產曾得罪王菲？
袁潔儀向來給人一種樂觀的感覺
袁潔儀向來給人一種樂觀的感覺，但事實上經歷不少低谷，在亞視時期曾與莫家堯拍拖7年，她曾說早期拍拖不能公開，當時可能靚仔又後生，所以有不少女仔埋身：「我成日問仲鍾唔鍾意佢，諗諗吓咪忍一下，但最後都係忍唔到。」袁潔儀後來發現男友與自己的女朋友撻着，最後在情人節的決定分手：「嗰陣佢打電話約我去食飯，點知去到無端端約埋我嗰個女朋友，不過我已經唔識嬲，完全放低咗呢個人，笑笑口食埋餐飯，之後就走咗，好似普通朋友一樣。」
