多得敏之教路丨一擊即中做爸爸　陳山聰：係冒險試一試

更新時間：22:38 2021-09-10 HKT
發佈時間：13:00 2021-09-11 HKT

陳山聰讚太太冷靜。

陳山聰早前為情如兄弟姊妹的陳敏之的YouTube Channel做嘉賓，節目在昨晚（10日）播出，敏之大讚阿嫂Apple很冷靜，而EQ又很高，山聰表示認同並說：「阿嫂真係好冷靜，求婚、結婚到影婚紗相都係一樣，記得喺產房門口等生仔，我自拍條片送俾佢，嗰陣已經喊晒，點知太太一直都好冷靜啲，叫我唔好喊，連麻醉師都忍唔住話乜原來拍戲啲眼淚係真，之後見到個仔出咗世，我喊得仲犀利，但係太太依然好冷靜，唔知啲麻醉藥係咪打咗去佢啲眼淚！」敏之忍不住問阿嫂有否激動時候？山聰坦白地說：「試過激到佢喊，(飲醉酒唔返屋企？)我冇唔返屋企，最多都係去錯咗另一層數！」

不過都試過激嬲老婆。

陳山聰與太太。

自從做了爸爸後，山聰幾乎將所有時間都放在兒子身上，敏之坦言未有想過原來阿哥都係好爸爸：「佢係浪子，鍾意愛情同浪漫，好享受個過程，唔會諗過有穩定生活，點知佢生個仔之後，世界只係有個仔！」山聰笑說：「18歲嗰陣鍾意小朋友，屋企多兄弟姐妹仲有啲姨甥，大咗咪出去玩，到我認識咗Apple之後，去到談婚論嫁之前，佢都有問過我想唔想生小朋友，我答咗佢一句，『生乜鬼小朋友呀，我哋兩個自由自在，想去邊咪去邊，玩咪好囉。』」直到Apple的妹妹生女之後，因為經常幫手照顧的關係，激發起山聰想做爸爸的慾望，殊不知輪到Apple不想，最後多得敏之教路，成功令山聰一擊即中做了爸爸！

陳山聰而家有仔萬事足！

將啲精力擺晒去個仔度！

當時敏之叫山聰「唔好嘥子彈」，在period來了之後的兩個禮拜才行房，山聰說：「我記得嗰陣拍緊《大步走》，就嚟結婚，有一晚飲少少酒睇完劇本，上床之後諗諗吓差唔多時候，嗰陣Apple瞓咗覺，咪諗住危臉試一試(好彩配合？)冇呀，佢鬧我你做乜嘢呀，咁咪試吓，原來嗰次係中咗，我係喺結婚前兩日先知有咗。」山聰還說：「我覺得結婚唔係最大改變，生仔先係，我覺得佢係唯一一樣真係屬於我嘅嘢，係流緊我嘅血。」