【調教你MIRROR】姜濤跳芭蕾呆晒懷疑人生 Stanley感迷失花姐認忽略

更新時間：19:44 2021-06-25 HKT
發佈時間：16:11 2021-06-25 HKT

MIRROR學跳芭蕾舞。

ViuTV節目《調教你MIRROR》昨晚播到第14集，「鏡仔」們因工作要暫別梅窩。中午眾人學跳芭蕾舞，大家都表現雀躍，Anson Lo（盧瀚霆）自言：「細個睇得《天鵝湖》多，已經對芭蕾舞好有興趣，好想學。」不過都有人enjoy唔到，平時Charm爆的姜濤慘變「僵」濤，舞姿生硬、表情茫然，完全跟唔上節奏。

姜濤被芭蕾老師Stephen指他的雙手似龍爪，踢腿時更多次不小心踢中身後的Edan（呂爵安），嚇得對方用手遮住重要部位！姜濤事後也自嘲：「證明我冇跳芭蕾舞天份，一入到去就覺得環境同我唔匹配！不過老師真係好有熱情，無時無刻都笑住，睇得出佢有幾熱愛。」Frankie（陳瑞輝）轉圈時十分流暢，獲Stephen讚賞。最後Stephen在跳得最好的Lokman（楊樂文）、Frankie和Anson Lo之中，選出Lokman做最有潛質的「芭蕾舞小王子」，Lokman更即場表演了一段舞，獲老師大讚。

姜濤跟唔上節奏。

姜濤搲晒頭。

其後12子回到當年參加《全民造星》時的試鏡場地，在導師和評判面前即場表演。Frankie坦言出道兩年多反而磨滅了自信：「我冇自信，而家我係進步咗，定係退步咗？有11個人同我一齊跑緊，跑得幾快都會有人追到自己，係真係大家一齊進步緊，定係得我冇進步？」他唱回參賽歌《無盡》，引來其他11位成員一齊合唱，梁祖堯（祖祖）也感動到眼濕濕。

Stanley（邱士縉）則重唱《愛是懷疑》，不過當祖祖叫他形容自己時，他突然表示有點迷失：「覺得自己長期都冇咩特別，反而以前比較有自信，而家要演戲，唔係做自己先有番多啲自信。望番以前嘅自己覺得唔太OK，同埋驚講錯嘢，有時唔敢講出心底話。」經理人花姐（黃慧君）也向祖祖說：「佢覺得好迷惘，（上年）喺台灣拍完劇之後好似冇咩機會，又睇唔到有咩前途。我都明，做呢行其實好冇安全感，而且Stanley會諗『年紀已經唔細，會唔會今年機會又冇咗？』，仲要係咁開《造星》。」

姜濤仲要俾祖祖整蠱。

姜濤踢腿時不停踢中身後的Edan。

花姐也坦承自己有做得不對的地方，「計埋ERROR有16個人，我冇可能將24小時平均分畀佢哋，邊個要特別照顧，我就會照顧咗先。我認為Stanley比其他人成熟，好似冇咩大問題，所以忽視咗佢。」祖祖好認同：「佢自我認同比較弱，最慘係唔想做自己心目中嘅弱者，而唔係人哋面前嘅弱者。」

Stanley最後和祖祖對話時也忍不住真情流露，他哽咽地說：「一首好簡單嘅歌，我分到兩句歌詞，但係練咗兩日都跟唔到拍子。我好𤷪我自己，點解我可以咁差？我好努力去做呢件事，但我……好似咩都唔係，好冇用，搵唔到自己價值。」他自覺在演戲方面的表現較佳，所以寧願做演員也不想做歌手。