【出院第一晚】執返條命仔好感恩余慕蓮：幾驚冇機會返出嚟

更新時間：08:22 2021-04-27 HKT
發佈時間：01:29 2021-04-27 HKT

因肺纖維被送入院，經過半年治療，昨日包到實出院嘅余毛驚現「筷子腳」。

83歲余慕蓮（魚毛）去年10月底因肺纖維被送入院，期間傳出她患上血液炎，一度入住伊利沙伯醫院深切治療部，經過半年治療病情穩定，昨日終於出院。雖然魚毛姐包到實坐輪椅由醫院推出來，身形清減現「筷子腳」，但精神奕奕。魚毛甫出院即接受了車淑梅的電話訪問報喜，她多次用輕快語調表示，很開心及感恩大家嘅關心，卧牀半年的她還變得幽默，笑住說：「𠵱家最希望係盡快可以企返起身。」

坐梳化睇劇舒服晒
經過一場大病余慕蓮開心謂：「返到屋企好開心，印傭幫我由頭洗到尾，沖涼洗頭及剪手腳甲，因半年冇剪好長，𠵱家坐喺梳化度睇電視，舒服晒，唔使瞓牀瞓到『籮友』爛。」車淑梅表示她消瘦了很多，余慕蓮直言：「半年喇，執返條命仔已經好感恩，我驚冇機會返出嚟呀...我真係諗住出唔到嚟，因為要做大手術，仲要喉嚨開窿插喉用氧氣，𠵱家傷口已埋口，好感恩，感謝唔同宗教信仰嘅人為我祈禱和祈福，亦感恩大家嘅關心。」

醫生叮囑她只能揮手同傳媒打招呼，唔可以做訪問。

大姐明一直好關心余毛。

今日要去銀行撳錢
至於不想大家接她出院，她解釋：「第一，係因為醫生話疫情好犀利，又出現有變種，而我啱啱康復，身體好弱，醫生怕我接觸到外界的嘅人，會受感染；但有好多人喺醫院門口『捕』我，我只可以揮手打個招呼，唔可以接受訪問，同人傾偈，因為醫生叮囑我只能做電話訪問，而且暫時唔方便畀人嚟我屋企，仲要盡量少出街，出街一定要戴口罩。不過今日會有人用輪椅推我去銀行，因為錢已花光，要出糧畀印傭和伙食費，仲要交管理費。」

希望快啲企返起身
她稱回到家中的第一餐飯，是吃蕃茄薯仔牛肉湯，並會叫印傭多煲猪肉湯或魚湯，但暫不能進補。她更感激薛家燕經常致電慰問，還有吳麗珠、安德尊等，而現在的印傭是由米雪介紹、很純品；另外亦寫了感恩卡給醫護人員，包括為她換片（尿片）的人，暫時晚上仍會用片。因卧牀半年搞到雙腳無力，醫生亦建議印傭陪她多行路，她已買了輪椅、學行車、及做運動的單車回家。余慕蓮掛線前表示：「要再一次多謝關心我嘅朋友，我已回家喇，大家唔使再擔心，多謝大家多年嚟仲記得我，回到家我好開心，𠵱家最希望係快啲企返起身。」