TVB頒發長期服務獎服務20年陳百祥望疫情快啲完結

更新時間：22:30 2020-12-08 HKT
發佈時間：21:00 2020-12-08 HKT

一眾獲長期服務獎的藝人合影。

無綫電視今日舉行「長期服務暨傑出員工榮譽大獎頒獎典禮2020」，因疫情關係遷移到電視城舉行。長期服務獎以10年為單位，其中製作部高層曾勵珍及韓馬利已在無綫工作40年；陳豪、陳山聰、歐瑞偉及陳百祥（叻哥）等人服務20年；陳庭欣、莊思明、翟威廉、張秀文、謝東閔、何雁詩及周志康等藝人亦有10年。

陳百祥表示，他於1970年加入無綫，期間亦加入過邵氏，但1978年正式簽約TVB，因此最少都有30多年，一定唔只服務20年。他又指今日是自己的舊曆生日，本月2日已拉頭馬當作慶祝。談到生日願望，他希望疫情真正渡過，香港人能回復正常生活。有機會講嘢，叻哥當然要好好發表偉論，他先指自己睇住樂易玲入行兼曾跟好友鍾鎮濤拍拖，又說：「余詠珊我直頭請你返嚟啦！」

叻哥獲服務20年的獎項，佢話自己最少都有30多年，不過計連續簽約嘅話，94年至今得26年咋喎。

00年加入TVB的陳豪獲服務20年的獎項。

陳豪就提到自己轉眼間已經服務20年，00年由電影轉到電視時還是乳臭未乾。問最大收穫是否13年娶到太太陳茵媺？他笑說：「係啦！所以話我乳臭未乾，到依家咩都乾晒。（有信心服務30年？）睇吓自己際遇啦，不過都要㗎嘞，小朋友仲咁細。」韓馬利指眨眼已在TVB工作40年，感覺像昨天的事。去年8月底自爆患腦膜炎的韓馬利談到減產時表示：「經過大病後，真係要思考做咩有意義嘅事。」

74年加入TVB的韓馬利獲服務40年的獎項。

陳庭欣是10年港姐冠軍，翟威廉則是10年香港先生冠軍，二人同獲服務10年的獎項。

日前陳庭欣被影到瞞著男友楊振源跟前度翟威廉短聚，其實當日是因為羅浩銘台慶夜抽到5萬元要請食飯。二人大方同時接受訪問，陳庭欣笑說：「所以我懷疑係羅浩銘放風畀記者賺報料費，可以慳返啲錢。」因限聚令關係，大夥兒再到翟威廉的清酒舖聚會。陳庭欣指男友知道當日有聚會，這宗「緋聞」就當疫下一點歡樂。咁庭欣又可有介紹女士給單身的翟威廉？翟威廉即表示對象要識唱歌及品酒，不過要等疫情過咗再搵。