【影評】《無價之保》演員出色故事夠晒Warm

更新時間：16:46 2020-11-18 HKT
發佈時間：16:30 2020-11-18 HKT

兩位實力派男星成東鎰和金熙元的演出不會互搶風頭。

即使距離喊餐死的韓劇年代已經過咗好耐，但相信一講起韓國影視作品，不少人依然對催淚題材記憶猶新。韓片《無價之保》就以親情作招徠，以窩心故事打動觀眾，加上「懷舊」同「超血緣」作包裝。雖然兩種元素略嫌「到喉唔到肺」，但勝在演員夠真情流露，想不被打動都幾難。撰文：何蔓琪

最慘一幕應該係小「勝伊」被賣到釜山，偷偷打畀「斗碩」求救。

「斗碩」和「宗培」後來唔再四圍收數，轉返正行開速遞公司。

故事設定在90年代初的南韓，單親媽媽「明子」（金允珍飾）爭人一身債，收數不果的財務公司大耳窿「斗碩」（成東鎰飾）和「宗培」（金熙元飾）帶走她的女兒「勝伊」（童年：朴昭怡飾、成年：河智苑飾）作擔保。點知明子因非法入境突然被遣返，斗碩和宗培幾經不同風波，最終決定擔起照顧勝伊的責任。毫無血緣關係的三人漸漸成為彼此的無價之寶，直到一天斗碩失蹤……

成東鎰以韓劇《回答吧》系列的「國民爸爸」形象深入民心，即使今次都係飾演口硬心軟的慈父，但不會予人一種戲路重覆兼Copy and paste的感覺。「宗培」金熙元雖然都係慈父，但就負責擔當好人一方，有別於斗碩愛你在心口難開的感覺，宗培的窩心來得直接得多，例如會為勝伊準備生日驚喜，從外到内都夠晒暖男，兩位「爸爸」的配合是相得益彰。朴昭怡演技亦不錯，特別喊的時候會睇到人好心痛，韓國嘅童星真係個個都好好戲。河智苑貴為韓劇女王，表現有一定質素，不過成年勝伊似乎未有太大發揮空間，比較可惜。

個人幾鐘意演唱會完場買卡式帶同CD嘅呢一幕，完全Show到「斗碩」嘅父愛。

河智苑有大晒國語嘅劇情，因為佢飾演嘅「勝伊」係中國朝鮮族。

今年韓國再度掀起復古風潮，而本片亦大玩「回憶殺」，例如傳呼機、Discman等等。最令筆者驚喜的是斗碩和宗培偷偷帶勝伊入場睇演唱會一幕，是向90年代當紅韓國組合「徐太志和孩子們」致敬，可以看出製作團隊的小心思。如可在懷舊元素之上再探討或描述多些（畢竟電影大部分時間都是講過去），而不是單純加入數種集體回憶會更出眾。「超血緣」的部分在勝伊童年及少年時期的著墨是足夠的，但就顯得成年時期有點薄弱。斗碩突然失蹤十多年，何以一直用盡方法尋人，多年後才找到下落？然而失蹤多年的原由又不夠說服力。最後河智苑以「爸爸」稱呼成東鎰的一幕固然動人，不過感動唔夠30秒電影就完結，若更完整落幕，相信後座力一定更強。《無價之保》將於明日正式上映。