【頭條獨家】陪囝囝英國學校面試徐榮掃防疫用品贈親友

更新時間：02:24 2020-02-28 HKT
發佈時間：01:06 2020-02-28 HKT

在倫敦難得遇到老友黃子雄，徐榮仲約埋囝囝的波友一家齊齊開餐。

徐榮早前農曆年期間和太太陪囝囝徐朗去英國中學面試，順道去旅行，本來此行打算一家四口去，但因新冠肺炎疫情嚴峻，為免4歲的囡囡包包（徐心怡）易受感染，以及戴住口罩坐長途機辛苦，無奈要撇甩囡囡。不過，他們一家三口亦不愁寂寞，除了趁機約埋剛巧在當地的黃子雄食晏，兩父子又去睇波，仲順道買防疫用品贈親友。採訪：杜淑霞

徐榮兩父子都是愛波之人，去到英國當然要睇番場英超，咁啱買到熱刺對曼城。

徐榮話影相多數由囝囝操刀，呢張泰晤士河旁影得唔錯喎！

徐榮謂13歲囝囝一直夢想到英國升學兼加入當地球會，為做職業足球員鋪路，他早前已將囝囝成績交到當地學校獲接納，此行只是進行體能測試，若順利通過便可於9月正式入學，「因為阿仔目標係做球員，揀學校都係以運動方面成績好為主，所以面試一定要考埋體能，希望佢今次合格，順利被取錄啦！」

徐朗有得面試心情好興奮，好希望能夠順利在英國升學。

受疫情影響，就算囝囝13歲生日，徐榮一家四口只能在家慶祝。

無奈撇甩包包
由於一家都是首次去英國，所以徐榮除了陪囝囝面試參觀學校，都有揸車落倫敦遊覽一下，「佢學校喺南部East Sussex嗰區，比較暖啲同天氣好啲，揸車去倫敦要個幾鐘，不過我哋都有去埋倫敦行吓，咁啱黃子雄又喺倫敦幫佢媽咪搞啲物業嘅嘢，佢仲帶我哋去食晏，又約埋阿囝球隊嘅成員同家人一齊去。」

徐榮在初四出發，當時香港疫情已開始嚴重，搞到他唔敢帶埋細女包包同行，他更順道為親友掃防疫用品，「包包年紀太細，佢戴得耐口罩又會敏感，去英國咁長途機佢實搞唔掂，既然係咁唯有留低佢喺香港會安心啲囉！我哋去到知道香港好多防疫用品都短缺，雖然我哋本身都有，但都幫啲親友去掃咗小小，但只限喺阿囝學校嗰區買到啲搓手液，口罩真係全程都搵唔到啦！」