今娶拍拖5年女友黃天頤　C君率兄弟接新娘玩到殘

更新時間：22:08 2019-12-13 HKT
發佈時間：16:42 2019-12-13 HKT

玩新郎環節，C君蒙眼幫兄弟洪永城塗紅唇膏。

C君今日做老襯喇，恭喜恭喜！
農夫成員C君（鄭詩君）今日迎娶拍拖5年的港台DJ女友黃天頤，並於晚上在中環四季酒店擺酒。今日下午，穿上傳統馬褂的C君則浩浩蕩蕩，與一眾星級兄弟團到酒店接新娘，當中包括陸永、蕭正楠（Edwin）、黃翠如、洪永城等，而好友唐詩詠就充當大妗姐一角。

甫到達新娘房時，兄弟團第一時間付上開門利是，其間姊妹們一度提出9990萬的銀碼，C君一聽到即抵死笑道：「呢個數李嘉誠都娶唔到老婆啦！」身旁的Edwin即向各兄弟「眾籌」，陸永突然高呼：「嘩！真係厚到利是封都擺唔落呀！」原來他們「作弊」用銀紙包住一包紙巾，結果被姊妹們發現即起哄，Edwin打趣道：「黃翠如得入面嗰包咋！」最終，C君以一封「開心大利是」順利過關。

蕭正楠同洪永城嘴貼嘴傳心心透明膠片，黃翠如在側邊看得好開心！

兄弟們一邊口含威化餅，一邊向住瞓在地上的C君做掌上壓！

到玩新郎環節，C君與兄弟團先穿上美少女戰士服，模仿美少女戰士變身，其後他再戴上眼罩口含唇膏，為兄弟塗上「大Red唇」，然後兄弟們嘴貼嘴傳一塊心心透明膠片，見Edwin與洪永城最得如此肉緊，真係有點令人打了冷震！最後，兄弟又「零距離」向住瞓在地上的C君，一邊口含威化餅一邊做掌上壓，仲要每做9吓便說出一句恭賀說話，搞到C君被噴到一面餅碎！

終於抱得美人歸，錫番老婆一啖先！

着到紅噹噹的唐詩詠（左）充當大妗姐一角。

順利過關後，C君便宣讀自己所寫的「愛的誓言」，他表示：「天頤婚前一直都唔畀我叫老婆、太太，就算有人叫佢做C君老婆，佢都第一時間否認，強調只係我女朋友。不過，過咗今日可以每日叫你老婆啦！一直以嚟好多新人都係讀愛的宣言，但係宣言係可以改或者唔算數，我自己度咗一段愛的誓言，如果做唔到就天打雷劈。」天頤聽到老公夾雜文言文的誓言既感動又開心，惟一對新人非常含蓄，新郎哥只輕錫老婆面頰一下。此外，擔任大妗姐的詩詠可能未背熟台詞，出現食螺絲的情況，場面爆笑。