大埔富蝶邨送外賣遇火警外賣員拉消防喉與居民齊心救熄網民致敬｜Juicy叮

時事熱話

更新時間：13:18 2025-12-15 HKT
發佈時間：13:18 2025-12-15 HKT

一位外賣員早前在大埔富蝶邨珍蝶樓送餐期間，意外遇上火警。在危難下，神勇的外賣員在消防員抵達前，與街坊合力拉消防喉救火，成功化解一場危機，獲網民致敬並譽為「真英雄」。詳情見下圖及下文：

大埔富蝶邨送外賣遇火警外賣員拉消防喉與居民齊心救熄網民致敬逐張睇↓↓↓↓

事發於宏福苑災難前一天

樓主11月25日在facebook群組「香港啤酒關注組」上載短片及相片發帖，而這件事的發生時間，剛好是大埔宏福苑五級大火災難前一天。

從短片見到，街坊毋懼濃煙持消防喉射水一幕；另外兩張相是消防到場的情況，和樓主事嘆收工啤的畫面。而在回應欄，還有網民上載由居民在走廊拍攝到，樓主和街坊救火的實況。

詳述事件來龍去脈

樓主在長文中講述在富蝶邨救火事件的來龍去脈——「今晚（11月25日）送外賣去富蝶邨珍蝶樓，搭升降機上29樓送某單位，搭到中途響警報同響警鐘，幸好到29樓開門，冇困升降機，咁張單話掛門口就可以了，我完成張單後，發覺唔對路，有陣煙味（唔通火燭？）」。

樓主接著表示，「已經有啲住戶開始走出嚟睇咩事，垃圾房有啲白煙，咁我自己推斷（啲煙係樓下升上嚟，唔係依層），我跑樓梯落下層睇，以有個阿叔拎住枝消防喉對住垃圾房，但係冇火原。我同阿叔講唔係依層，要再落，我同阿叔講一齊落，有啲咩事互相照應，阿叔：好」。

樓主續講述救火情況，指：「終於落到25樓，火原喺垃圾房入面，裏面好大煙，我同阿叔反應好快，阿叔開消防門櫃，佢太急，用拳頭打水龍頭塊玻璃片，我：唔好用手，旁邊有枝細錘仔。咁爆開咗，我就拉咗水龍頭出嚟，有個哥仔幫到手，拎住水龍頭衝過去垃圾房，我拉喉，阿叔開水制，我叫哥仔：濕件衫揞口呀。佢一開垃圾房個門，啲濃煙湧晒出嚟走廊，佢吸咗兩啖濃煙搞唔掂，我同阿叔接力射水，濃煙向上升，我哋踎咗喺度（避免吸入過量濃煙）」。

源頭係其中一個垃圾桶

樓主憶述「繼續救火嘅時候，我見到有個女人用毛巾揞住個口企喺濃煙走廊中間，我：快啲走呀，企喺度做咩呀，落樓梯呀。根住阿叔煙到眼，睇唔清楚搞唔掂，接力等我嚟，你去樓梯避一避，叫其他幫到手嘅，拉多一枝喉上嚟，依到我頂住先（我戴住頭盔有面鏡頂住啲煙），最終找到火的源頭係其中一個垃圾桶，我沿住源頭射水，最後俾我救熄咗喇」。

最後樓主表示「救熄咗，消防員先剛剛到，我：交俾你哋喇！～（出晒汗的我，行20幾層樓梯落樓，見到啲阿婆阿伯帶住啲孫仔行落樓，我救熄咗，消防員善後緊，返屋企啦，咪行喇）」。

樓主在帖文的「後感」中表示「（當然，要判斷自己做唔做到，可唔可行，幸運地住戶發揮合作精神，先可快速救熄場火，香港人~獅子山精神💪）#收工啤#外賣師」。