鯁骨衝急症室求救 醫生照X光「釣魚骨」得個桔 護士陰陰笑：原來鯁呢種魚骨｜Juicy叮
發佈時間：16:00 2025-11-02 HKT
有市民鯁骨後到急症室求救，醫生替病人「釣魚骨」兼照X光檢查，忙來忙去結果卻得個桔。有護士爆料指，原來累病人鯁骨的是一種特別的魚。有網民則好心提醒飲食時小心鯁骨，因情況可大可小兼辛苦。詳情見下圖及下文：
鯁骨衝急症室求救 醫生照X光「釣魚骨」得個桔 護士陰陰笑逐張睇↓↓↓↓
魚骨釣唔到亦照唔到
facebook「急症室日務」前日（10月31日）上載相片發帖，講述一則急症室的「釣魚骨」故事——「做咗幾十年護士，第一次見人食『魚』鯁魚骨，要嚟急症室『釣魚骨』。
醫生原來又無食過呢種『魚』。結果醫生好努力、在意，幫病人『釣魚骨』。仲要照埋X光。差點仲要去做埋內窺鏡。最後，魚骨釣唔到。
魚骨亦照唔到。」
不過成班護士聽到整個過程，細細聲係度🤣🤣🤣🤣🤣🤣。🤨🤨你估下佢硬咗咩魚魚骨？見到（附圖）答案嗎！」
網民：食白飯魚插咗條骨喺喉嚨椗
雖然有網民質疑「白反魚應該冇骨㗎」、「白飯魚有骨可以啃㗎咩？」、「唔通係King size（特大）白飯魚？」、「白飯魚，啲骨好細，佢成條鯁？」。但有網民指「我上個月係食白飯魚插咗條骨喺喉嚨椗」。網上資料指白飯魚的骨頭幼且柔軟，通常可以連骨一起食用。
相關閱讀：太古城食放題魚藏大堆蟲「麵條咁長」 埋單仍收$700 侍應咁回應震驚網民
網民分享鯁魚骨慘痛經歷
另有不少網民分享鯁魚骨的慘痛經歷：
•我女試過鯁魚骨入急症室真係要照埋內窺鏡；
•我試過食鯪魚肉釀青椒，要到醫院急症室鉗返條魚骨絲；
•試過鯁紅衫魚骨去咗急症夾唔到，要第二日照胃鏡再夾返出嚟；
•我食魚片粥條刺入咗牙肉，自己對鏡搞咗大半小時，從此不吃魚片；
•我仔細個食鰻魚壽司🍣喉嚨插鰻魚骨😔要去急症室由醫生夾返出嚟；
•我試過食紅燒魚柳零食鯁魚骨，睇急症，醫生幫我喺喉嚨噴麻醉藥後鉗返出嚟；
•我鯁過。好辛苦。因為如喉嚨腫脹會阻塞氣管。要照X光，醫生收入院，照胃鏡；
•我細個時都試過，不過我嗰嚿係鯪魚肉釀豆腐，入急症室搞咗好耐先整到，喊到癲咗；
•我媽咪都試過呀！（嗰次食鯇魚腩）急症室醫生見到釣唔到...要上外科病房用鏡鉗囉；
•鯇魚骨，試過咁樣入急症，醫生試咗好多次都整唔到，話試埋最後一次再唔得，就要用胃鏡 。好彩整到；
•我細個食釀鯪魚都因為鯁骨睇急症，照X ray（X光）又真係照到，後尾醫生幫我用手術鉗，鉗返條三叉骨出嚟；
•我試過食酸菜魚，搞到要入急症室，當時以為自己會死，好彩急症室個醫生巧妙地用支針筒個針頭幫我挑返條魚骨出嚟；
•黃立䱽半年內分別兩位家人要去急症搞，整到真係唔好拖，屋企老人家拮咗牙肉幾天先講，係急症室醫生話仲咩拖都面腫先去睇，要轉院入院睇牙科好似住咗3至4日先可以出院；
•我真係試過食阿媽整的鯪魚球，食完條魚骨黐咗喺個喉嚨度，無論之後飲水，食麵包食飯都沖唔到佢走，之後真係要去急症室，醫生要用開口器同鉗鉗返佢出來...搞到我以後都唔敢食鯪魚球...
資料來源：急症室日務＠facebook
相關閱讀：買魚送「刀片」魚頭被𠝹一手血 網民：個魚頭好有生命力↓↓↓↓
有網民在魚檔買了片鮫魚，魚販贈送一塊魚頭，誰料因福得禍，魚頭竟如刀片，事主用手一洗即刻被𠝹，血流如注。事主在社交平台發帖公開事件，引起網民關注熱議，詳情如下↓↓↓↓
