搭港鐵3站3遇「白斑怪漢」 夜歸女疑遭跟蹤嚇到起雞皮 網民教脫身提醒勿做一事｜Juicy叮
發佈時間：11:28 2025-10-24 HKT
有夜歸女日前乘搭港鐵時遇上恐怖片情節，發覺懷疑被一名「白斑怪漢」盯上，同一程車竟連續在3個車站都遇上這位怪男，被嚇到「起晒雞皮」。細思極恐下，女事主在網上講述經歷警世。有機警的網民則教路如何脫身，特別提醒在這情況下切忌做一事。詳情見下圖及下文：
搭港鐵3站3遇「白斑怪漢」 夜歸女疑遭跟蹤嚇到起雞皮逐張睇↓↓↓↓
樓主：地鐵驚魂記
樓主本月21日在社交平台Threads以「地鐵驚魂記」為題發帖詳述件：「各位女仔夜晚搭地鐵真係要小心，隨時要留意下有無被變態佬跟蹤！今日夜晚練完波搭到九龍灣站嘅時候見到有條友（手腳上有白斑+斜視+睇落有少精神問題）企咗喺扶手隔離，feel（感覺）到佢應該有哨我，但係佢眼神無對焦我又唔係好分得清，佢可能知道我有一直為意佢跟住喺下一個站落咗車（呢度係重點！！）因為我懷疑佢可能專登走咗去另一個車廂，想我放鬆警惕…」。
樓主續指：「跟住我喺鑽石山站轉車去屯馬綫，坐低一陣之後發現條友居然無啦啦出現喺我面前仲要坐喺我隔離？？？本身睇緊Netflix（電影）但喺個刻即刻成個人開始警惕，跟住我有一直觀察條友同埋附近嘅情況，於是決定喺顯徑站落車，我仲要等到最後閂門嗰下先出去 ，之後我見到條友即刻企咗起身向車廂嘅反方向行！」。
樓主接著稱：「咁我就等下一班列車來再上車，中途我都有同男朋友call（聊天）+同朋友keep（保持）住聯絡，上咗車之後發現人都幾多，咁我左望望右望望好似無見到佢就搵個位置坐低咗，點知！！！我坐低1分鐘唔夠就見到條友喺後邊車廂行過嚟？？？嗰下真係起晒雞皮以為自己睇緊恐怖片，咁我就一直睥住佢，佢可能都知我已經對佢有戒備所以無坐低喺我附近，佢一直行去前面車廂，跟住我就同佢行反方向，到站一開門之後即刻狂奔返屋企」。
樓主在回應欄補充：
•見到一次兩次都算，但係第三次我為咗避開佢已經專門等多咗一架車，佢都仲可以出現係我面前…簡直細思極恐，仔細諗返，真係好恐怖。
•我懷疑佢見到我落車之後無即刻行去出口，跟住佢都係下個站落車等下一班車，應該博我哋上咗同一架車。
•本身都expect（預計）唔會再撞見條友，點知下一秒佢出現喺我面前真係差啲嗌救命。
•好彩車廂入邊多人，如果唔係真係嚇到癲。
相關閱讀：夜歸女南昌站遭搭訕 陌生漢癡等唔走嚇到手震 即興使出一招即甩難
網民教路脫身時切忌做一事
有回應的網民感慨「依家世道真係好亂，女仔搭地鐵都要保持警覺」、「好似恐怖片咁，所以千祈唔好掛住睇手機！一個女仔出街都要好小心至得！」。
對於樓主身處險境，有網民特別提醒「如果條友真係咁癲，唔好直接跑返屋企，如果你唔夠佢跑／可能俾佢跟到，知道你屋企喺邊就慘了～建議去咗附近多人地方搵人幫手先，再搵人嚟接你會好啲，唔好自己一個～」。
另有人建議「名正言順開video cam（拍攝）自拍邊講自己喺邊，故意映埋佢先，佢身有屎嘅話一定驚過你，你亦錄影存證咗」。
相關閱讀：酷熱著少布 「𥄫女黨」衝突頻生 港女斥猖獗：前世未見過女人咁 「視姦vs望唔蝕」掀議
有網民分享同類經歷：
•我喺銅鑼灣地鐵內都遇過黐線佬跟住我，到月台等車嘅時候佢望住我越行越近，我知佢目標係我，我即刻由車頭行到車尾，睇下有冇善良嘅路人可以幫我（因為自己一個真係幾驚），最終搵到地鐵職員說明情況，個黐線佬都冇跟上嚟啦。
•好明白你，我有類似經歷！嗰陣個男人係喺屋企樓下跟我到地鐵站…佢行我前面keep住擰轉頭望我，我又係好似你咁，為咗避佢行咗第二條路，點知去到地鐵附近佢喺我隔離行過，企係我前面擰轉頭望住我笑……我嚇到企咗喺度好彩佢繼續行，之後就冇再見到佢。
•周圍都有。試過喺馬鞍山海傍坐低食嘢，跟住有個男人坐隔離。食完行去公園坐低，個男人又坐隔離張櫈，坐咗陣同小朋友行去公園另一邊遊樂場玩，個男人第3次出現我就覺得有個男人有問題，但因為星期日公園好多人，我又無驚。
•試過有女同事俾個赤膊白卡佬跟埋入office（辦公室），好彩我早返去坐咗喺大門口度嚇走條友，個女同事完全唔知有人一直跟住佢尾仲要貼得好近嗰隻，都唔知俾人跟咗幾耐…所以真係出街要帶眼留意周圍環境，你發現佢先好過佢target（目標）你先。
資料來源：fc_tzhng＠Threads
相關閱讀：港人廣州酒店疑被踩線男死跟 起戒心不入房疑匪突「咁做」 事主震驚：我覺得有啲危險↓↓↓↓
有港男與女友北上廣州住酒店，遇到懷疑竊匪「踩線」瘋狂死跟，港男分享驚險經歷表示自己一度企在電梯門口不入房，誰料該踩線男仍沒有知難而退，繼續做出一些舉動，令他感到「有啲危險」。事主亦交代最後如何成功撇甩踩線男的跟蹤，詳情如下↓↓↓↓
