李辰安 - 球王唔係事必要靚仔有型｜辰來之筆
發佈時間：03:00 2022-12-20 HKT
踢完世界盃，但唔好問我賽果，因為我關心並非邊隊捧盃，而係呢個世紀，邊一個係球王。
今日去中環酒館吹水，踢完世界盃，大家都好似無乜牽掛囉，所以入到嚟就唔好再講波經。「安仔，你都無乜點關心世界盃，依家你想講乜嘢話題？預測中國男子足球幾時再入決賽周。」我無佢咁好氣，如果男足要追上嚟唔係好難啫，摩洛哥咪有樣你睇。「大師兄，你自己上網睇啦，2015年9月，即係七年前世界足球排行榜，有兩位難兄難弟，簡直就係胡楓同謝賢咁，好唔得掂，我哋中國隊排八十四位，摩洛哥排名八十五。」
張翁今日好心情，因為防疫政策急轉彎，經濟馬上會有蜈蚣彈，2023年係好世界，老人家未飲威士忌都已經紅光滿面。「嘩，一個係吳聚財，即係謝賢啦，另一個係周日清胡阿修，中國同摩洛哥，真係無人睇得佢哋起。」就係咁，如果周日清都可以掂，好快就到吳聚財，道理就係咁簡單，唔好成日瘀中國男子足球，學下正面思維，人生亦會更好過。當然，我唔係喺度教訓大家，成日搵自己嚟瘀，有乜建設性呢？
「安仔，你都九唔搭八，大家係想中國足球進步啫，係咪講兩句都唔得？」我都無你咁好氣，同張翁一起飲威士忌，
「咦，靚仔侍應碧咸放大假咩，唔見人，走咗日本同人逼呀。」後生仔梗係貪玩啦，睇完波，放下心頭大石，最好同女朋友返鄉下。「你都好似放下心頭大石咁噃，你又有乜心事想同大家分享？」銀行偉，我想話你知，本世紀有兩位好波之人，同時期出現，一個係高大威猛Fit到漏油之C朗，另一位係踢波好似遊花園散步，毫不起眼之美斯（見圖），你話邊個先稱得上球王？你唔好話兩個都係，咁等於選香港小姐選出雙冠軍，你千祈唔好咁犯駁呀。
張翁首先發言︰「C朗同美斯過去當打之年攞獎攞到平分春色，之前足球壇由兩大天王話事，不過，一時之間好難講得出邊個好波啲，邊個可以稱得上二十一世紀世界球王。」
「我就一向都話C朗係王者，美斯太似路人甲乙丙，佢唔係忽然整球射中龍門，或者直情入波，你會覺得呢位仁兄係咪執波仔。」大師兄，你鋪話法，學似星爺電影對白︰「高手唔係事必係靚仔有型，只不過你啲升斗市民一廂情願嘅諗法噃。」係呀，球王唔可以插住個袋全場行下行下咩？「都無話離行離列啦，你睇美斯同荷蘭人講手呢一場就知，佢面懵心精，佢犯規起嚟都好陰濕。」
大師兄此言差矣，你估依家係講清高之年代，畀人踢到飛起，剷到跛腳都要忍住痛扮無所謂？黃飛鴻咁君子都唔係咁順攤，你睇石堅死咗幾多次？你唔好以為針對美斯，自以為高大就可以恰佢，美斯都可以好茅，睇下對方點踢我就點踢，呢啲先至係王者性格。當然，我無將呢番道理講出口，費事大家拗餐飽，不如食塊薯片好過。
銀行偉好持平咁分析︰「C朗太過王者，所以諗嘢開始諗埋一邊，佢已經自封為天下無敵足球王，所以由領隊、教練到球證都無面俾，班隊友更加無得同佢平起平坐，咁咪出事囉。」係，人老咗，再無能力控制全場，但本身思想跟不上，仲以為佢先至係宇宙最強，當然不得人心。「所以話，C朗因為年紀大過美斯，蝕底在呢一屆佢已經撐唔起場，仲要做後備，臨尾畀美斯攞晒分，依家你唔認亦都唔得，因為以後歷史之評議，就算阿根廷捧唔捧盃都好，美斯總得分就會超過C朗。」
大師兄話，阿根廷之前嗰位球王馬勒當拿係好好波，同時都係食腦嗰種天才。今時今日講呢啲？你又似乎好似唔多與時俱進。「世侄，踢波踢到三十幾四十歲都可以繼續拼搏，但係收尾嗰兩年最好係抱着開心足球嘅心態，當然，你唔想成日做後備，咪掛靴啦，好似C朗咁，大把錢又有人氣，學碧咸轉行做明星好過。賣廣告都執到你手軟，借用星爺金句︰仲踢波？」
不過，人係好奇怪，好似C朗自覺係王者，所以唔服，撐到盡扯到行，但好可惜，你係咪球王係由大眾決定，所以美斯呢位看似無乜王者霸氣之高手，最終封王。老友，呢個世界乜都整定，隨緣啦。
