李辰安 - 喜劇首相一個接一個｜辰來之筆
發佈時間：03:00 2022-09-06 HKT
英國首相約翰遜卸任在即，第二代鐵娘子卓慧思（見圖）可望延續英國的喜劇效果。世界太緊張啦，輕鬆下喇。
我同酒友相聚好少講政治，因為有咁多話題好講，使乜搬個維園論壇過嚟呢？「世侄，論壇停咗好耐啦，講故事不如去榕樹頭。」大師兄讀書時代都幾關心時事，不過，大熱天攝氏三十幾度去學海德公園論政傳統，人噏你又噏，你估可以上位，唔使大學畢業都可以當月入幾皮嘢之議員筍工咩？你都想多咗。
「安仔，我幾時話過要去維園，山長水遠，去相睇都嫌麻煩，睇電視直播OK啦，成班師兄弟喺宿舍大堂涼冷氣，題目啱傾就大家場外吹水，順便練下辯論技巧，方便第二日考AO。」銀行偉同大家講，英式辯論好有益和建設性，如果香港人由細到大都講英文、學辯論，咁就可以贏在起跑綫。不過，以上係以前嘅事，依家就唔係咁。
好似喜劇之王嘅約翰遜做大英首相，佢表現係棟篤笑而不是英式辯論。「約翰遜風格似許冠文定係黃子華？」我搶答︰「兩個都唔似，香港唯有周星馳可以同佢爭鋒。」乜星爺有玩棟篤笑？大師兄話我九唔搭八。「你話星爺同達哥玩相聲都講得通，不過大英首相無搞過二人相聲。」如果佢同特朗普拍檔做真人Show，應該幾好效果。「安仔，你不如話搵呢兩位大神做獎門人。」
好嘞，大家飲到咁上下，開始入正題。「獎門人一定要有歡樂小姐，卓慧思就真係人才，試想有佢出場嘅話，隨便發幾句謬論，都可以笑聲殺地球。」我其實無誇張，卓慧思未上任首相寶座已經同全世界講明，如果危急關頭，佢做首相嘅話，一定毫不猶豫按下核彈按鈕，結果畀網民同輿論批評為有毁滅人類傾向之冷血政治動物。
「係囉，佢係女殺手，又點會係歡樂小姐？」張翁，你知否俄羅斯有位外交部女發言人，口才同轉數似Do姐咁勁，叫做扎哈羅娃，聽到未來英相咁有殺氣，公開窒佢好似喜劇《凸務之王》之角色。「我就睇過戇豆先生，真係笑死人，估唔到仲有凸務之王，英國確係人才濟濟，除咗足球興盛之外，成個英國都有濃烈喜劇氛圍，當下世界如此鬱悶，英國難得惹笑。」
「其實英國係擁核國家，首相彈指之間射核彈有乜出奇，有乜好笑？」偉哥，我就話應該改為「意唔意外，開唔開心」，意外係英國唔係核彈大國，此其一，英國國土有限，人口有限，如果你當撳錢咁撳個掣，你估結果如何？「英國對頭人唔會係美國、法國、以色列或者印度，好大機會係俄羅斯，亦有可能係中國，真係互射嘅話，呢鋪唔係十二碼，而係大英消失記。」咁你話，開唔開心？
好嘞，做乜講政治，仲要係國際政治？大家飲杯冰凍啤酒喇！「其實，我想講喜劇啫，係你哋扯到咁遠。」講時講，維園講壇已經過氣，唔好學舊式英國辯論，英國最有號召力係棟篤笑，如果有志移民或者移居英國，去到英國就要拜師學英文棟篤笑，一個人一支咪係咁講足一個鐘，每一分鐘一個Gag，每十分鐘一個高潮，如是者，仔女大咗可以選擇從政，選各級議員，如果此路不通，無問題，英國好多酒吧，棟篤笑人才一定有得撈。「安仔，你想講，有機會好似上世紀八十年代之Lounge王子李龍基，一晚走十場八場賺英鎊？」係啦，呢一行可以好易發達，亦可以做Youtuber，有一千幾百萬Followers，你就可以唔憂食。
當然，星爺已經成為一代宗師，大家可以承接星爺大業，唔需要由《四三零穿梭機》做起，直接可以做喜劇，唔拍《凸務之王》，可以係《國產凌凌漆》。「你啲咁出色嘅男人，無論喺邊度，都好似漆黑中嘅螢火蟲一樣，咁鮮明，咁出眾。你憂鬱嘅眼神，唏噓嘅鬚根，神乎其技嘅刀法，同埋嗰杯Dry Martini，都徹底咁將你出賣咗。」呢段棟篤笑係咪好經典呢？
「安仔，呢段經典係女配角之獨白發言，又唔係棟篤笑。」算啦，大家開開心心又一日，你估大家真係要開戲咩。好啦，飲到咁上下，不如食少少嘢，換過其他話題再吹過，唔好講政治。「講乜好？」不如吹下幾時打風，上次個風打唔成，大家好似唔收貨。其實，我都唔知講乜，休息下先。
