嫌$8000津貼太少？港男失業報ERB呻「倒貼車飯錢」遭培訓中心怒轟 網民幽默教路：揀呢類課程唔會蝕...
發佈時間：12:25 2026-08-07 HKT
本港近月失業率維持於3.7%，意味著逾14.1萬人正面對「無工開」的困境。在求職空窗期，不少人會選擇報讀僱員再培訓局（ERB）課程，藉此自我增值兼賺取津貼。不過，近日有網民就發文抱怨ERB津貼太少，直指上堂連「車錢飯錢都蝕埋」，結果引來培訓機構小編炮轟反擊，更有大批網民幽默教路，盤點「性價比最高」的再培訓課程，引起熱烈討論！
失業網民嫌ERB $8000津貼少 狂呻「車錢飯錢都蝕埋」
早前有網民在連登討論區發文，質疑報讀為期兩個月的ERB課程是否只得8,000元津貼。他大呻若無其他收入，上堂還要「倒貼」交通及膳食費，揚言「如果返2個月得8000就唔X讀，車錢飯錢都蝕埋」。他更直白地表示，報讀課程只為「貪有嘢學又有錢攞」，若讀完比未讀更窮，又找不到工作，便覺得「唔係好抵玩」。
培訓中心小編鬧爆 「想法走樣」比失業更可怕
這番言論隨即觸動了培訓機構的神經。有自稱「實習中」的培訓中心小編在社交平台Threads發文反擊，直斥部分人態度不正確。小編強調，失業人士讀ERB是為了爭取轉行機會，而非「有份工-->辭職-->靠做學生做收入」。小編更語重心長地勸勉：「保持人間清醒，好嗎？失業不可怕，可怕嘅係想法走樣。」
小編的帖文引起廣泛共鳴。不少網民批評該發文者心態有問題，直指「ERB津貼只係幫補下，點可能靠呢啲錢賺錢維持生計」、「免費學嘢仲想點」。有人更指出，培訓機構區區有，根本毋須長途跋涉，狠批「話蝕車錢先戇居」。亦有網民一語道破：「呢啲人會長期失業，係心態問題。」
網民幽默教路 揀呢類課程唔會蝕？
在一片批評聲中，亦有不少網民幽默分享「唔會蝕」的選科攻略。有網民極力推介「煮食班」，並排出優先次序：日式、西式、點心、中式、甜品及咖啡。他解釋日式班有刺身、壽喜燒任食；但就不建議中式班，因為「隻鑊同把刀好重，太辛苦」；甜品類則怕「食得太多會糖尿」。有讀過點心班的過來人亦和應，指雖然要每日企足八小時切菜洗碗，但「整嘢食始終係開心嘅」。另一位網民則認為「電腦班」才是性價比之王，笑指上堂「坐喺個位度咩都唔使做，有電腦玩自己聽歌上網，計啱夠出席率80%，臨尾考試嗰堂消失，八千幾蚊津貼袋袋平安」，力撐是「 真人真事」。這些搞笑的分享，甚至惹來培訓中心留言笑指是「學員攻略」。
翻查資料，ERB轄下的「就業掛鈎課程」專為失業人士而設，免學費之餘，自2025年起每月津貼上限更提升近四成至8,000元，一年內最多申領一次，大學畢業生亦符合報讀資格。ERB與逾80個培訓機構合作，提供超過800個課程，津貼的出發點是為學員減輕經濟壓力以提升技能，增加就業機會。
資料來源：ERB 僱員再培訓局
同場加映：
42歲港男厭世想「躺平」？ 靠退休公務員阿爸長俸過活 每月呢個數「慳慳地夠使」
ERB就業掛鈎課程/申請資格一文睇！ 學費全免+每月津貼達$8,000 附8大熱門課程推介
