楊英偉演《真情》木村原來係執二攤 棄高薪教職入TVB 移民奧地利主因不滿香港一問題
發佈時間：11:00 2026-08-16 HKT
前TVB「綠葉王」楊英偉是香港演藝學院首屆畢業生，畢業後先後在香港話劇團、有線電視、TVB及HKTV都留下了演出足跡。近年，楊英偉選擇與家人舉家移民奧地利維也納，展開人生新一頁。早前楊英偉返港與老朋友見面，期間曾接受演藝人協會的訪問，大談當年為了演藝夢想的瘋狂抉擇，以及經典角色「木村」的誕生過程。
楊英偉臨危受命演出「木村」
楊英偉當年憑處境劇《真情》飾演自大兼愛認叻的「木村」走紅，但原來這個經典角色差點與他擦身而過。楊英偉在訪問中透露，該角色原定由張兆輝演出，但因對方眼部有事需休養兩個月，才讓他有機會臨危受命。這個對伴侶呼呼喝喝、信口開河的大男人，與現實中會買餸煮飯、極度愛錫太太的楊英偉截然不同。
相關閱讀：前TVB綠葉王楊英偉移民歐洲6年罕返港 重遊九龍城狂派手信 感嘆奧地利難找到家鄉味？
楊英偉放棄教書生活決心追夢
楊英偉在1995年曾面臨「理想與現實」的交叉點，最終毅然放棄拾起教鞭的安穩生活，決心追尋演藝夢。在訪問上，楊英偉稱當時離開了香港話劇團後，曾短暫轉行教書約八個月：「其實我想繼續教落去嘅。我好鍾意班學生，學校都好好，睇到自己一路做，你就升咩科主任，或者你去第二間教，升咗科主任，你就要諗人工啦。嗰陣時我萬零蚊，我讀埋教育文憑，好簡單，你跟住你做科主任，就係三、四萬蚊啦。你做到副校長就更高，你退休又有一舊錢，你唔使咁擔心生活嘛。」直到一次經朋友推薦的有線電視主持面試，徹底改變了他的軌跡。在第二次面試時直接遞上合約，要求他三天內作決定。面對人生的痛苦抉擇，他反問自己：「你有幾鍾意表演？鍾意，我好清楚，咁唔教書啦。我一清楚就走去講。講咗之後呢，兩班學生都喊，喊完我都喊。那就跟他們告別，我同呢班學生而家仲有聯絡。」
木村這個角色令楊英偉深入民心
楊英偉稱高志森、古天農和杜國威成立「春天舞台」，重演《南海十三郎》的時候，曾勵珍在場看了他的演出後，問他有否興趣去TVB：「我當然有啦，於是咪去見佢，其實佢以為我仲喺有線工作，其實嗰陣時啱啱離開咗。我咪話：『其實我被炒魷了，我隨時可以嚟。』跟住我記得珍姐話：『你做咩要話畀我聽，你咁坦白嘅？你唔好講嘛。』佢就請咗我。點解會加入《真情》呢？《真情》唔係我做嘅，係張兆輝做嘅，cast咗（選角）㗎啦，但係張兆輝當時啱啱隻眼有事，要做手術，醫生叫佢起碼要休息兩個月唔好拍嘢，於是騰空咗呢個角色，咁我先可以加入去。成個故仔係咁嘅。」木村這個角色令楊英偉深入民心，為他帶來不少演出機會，早年曾試過演出惡搞短片《唔長假期》，有網民笑言「香港只有一個木村，就係楊英偉」，他亦表示：「嗰陣時鋪天蓋地喺Facebook、各大媒體出現。我記得有一次好好笑，我乘搭地鐵，我現在住九龍灣，搭地鐵，到了地鐵站，旁邊有一位女士，揸住個電話，揸住電話，我喺隔離，望了我幾次，然後我問佢咩事？「我喺度睇你。」佢喺度睇緊《唔長假期》。影響力很大，而且呢個角色最難，因為完全唔係我，一個大男人。」
相關閱讀：《真情》移民男星多搞作 帶團歐遊12日收X萬元唔包機票 開Live預告行程超興奮
楊英偉真心感謝李司棋
楊英偉續說：「喺現實我都係大男人，但我係一個很錫屋企、很尊重太太嘅大男人。我會買餸煮飯，但唔係嗰種對住伴侶呼呼喝喝、懶醒、自以為聰明、信口開河嗰種大男人，係要創造、要適應。其中一位教識我最多嘅，真係我到而家都多謝，司棋姐。司棋姐係點樣嘅呢？佢係很真心嘅。因為我們讀戲劇，我們要諗合唔合理、要諗整體，我們不是介意自己出唔出到位。司棋姐看在眼內，就話：『木村，唔好剩係諗啱唔啱，諗下自己出來好唔好睇。』係喎！因為我們演員是一個整體，佢就覺得唔好諗，要諗自己，我做這些事好唔好笑，我做這些事觀眾鍾唔鍾意，我做這些事得唔得，能不能入屋、能不能走進觀眾心中。」
相關閱讀：楊英偉移民奧地利近況曝光！學足兩年德文 適應無難度：有錢一定得㗎
楊英偉2020年底舉家移民奧地利
另一個要多謝的人是薜家燕：「家燕姐係一個襟撈嘅人，搵食王。佢又肯帶我登台，帶咗我好多嘢啦。所以其實《真情》到現在都係難忘嘅。因為都三、四年，到現在，我喺維也納，就算有內地的人、有香港人，都係叫我『木村』。」楊英偉在2020年底帶同妻兒及年逾90歲的老父低調移民奧地利，移民主因是不滿香港主流教育制度的巨大壓力，希望為發育稍緩、曾受壓自殘的兒子提供一個無壓力的「以人為本」學習環境，他曾大讚奧地利生活節奏慢、物價合理（如租住1,300呎大屋），教育及居住環境優良，楊英偉除了經營自己的YouTube頻道分享歐洲生活，他亦曾接拍當地廣告及擔任歐洲旅行團導遊。
