陳凱詠望闊少Tyson「見識」添號召力 被難民營屎堆廁所嚇破膽丨獨家
發佈時間：08:00 2025-09-19 HKT
31歲獨立歌手陳凱詠（Jace）今年七月應國際培幼會邀請，首次參與慈善探訪，前往貧窮問題嚴重的孟加拉。她不僅深入全球最大、最擁擠的羅興亞難民營，還走訪首都達卡的貧民窟，了解當地女孩面對貧窮、性暴力及童婚的困境。即使當時正忙於籌備新唱片，Jace仍認為機會難得，毅然暫停工作出發。採訪：方騫平
Jace形容這七日的旅程絕不輕鬆，除了路面顛簸、長途車程勞頓，還遭遇水土不服，更嚴重感冒「變喪屍」。她笑言：「原來香港人適應力真係強，但見到當地人嘅故事更加唔簡單，我就乜都忘記喇。所見所聞太深刻，返香港之後要用成個禮拜消化。」令她感動的是，當地人對外來探訪者非常熱情，送上擁抱，眼神充滿期盼與希望，「令我都充滿力量。不過，我唔係咩女神咁偉大，只係做簡單嘢都可以幫到好多人。」
最令Jace印象深刻的是當地女孩與香港的文化差異，「佢哋因為冇資源，十幾歲就要結婚。相比起香港女仔真係幸福好多，我十幾歲時仲係玩緊、上堂瞓覺、小息掛住食雞髀，諗去邊度旅行同扮靚……佢哋即使好想讀書都冇機會，做到老師係最大夢想，希望用知識改變命運，唔想童婚、唔想繼續喺惡劣環境生活。」
未見過震撼畫面
談到當地衛生設施，Jace猶有餘悸：「真係好得人驚！成村人用得三格廁所，喺又逼又污糟、冇浴簾嘅空間沖涼甚至去廁所，所有男人行過都望到晒，咁點算？根本冇可能安心屙到。」她指出當地女性每日面對性騷擾恐懼，極難安心。幸而有團體資助學校興建新式廁所，「至少有門可以關，內置M巾機，去廁所同換M巾都安心好多。」自認「男人頭」捱得的Jace，也坦言無法踏進當地污糟廁所半步：「我一打開門，見到廁所滿佈屎堆，糞便湧出嚟，真係一世人都未見過咁震撼嘅畫面，恐怖情景歷歷在目。」她幽默比較：「當成個娛樂圈好多人去意大利參加Tyson Yoshi奢華婚禮，我就去咗孟加拉貧民窟同難民營，完全係另一個體驗。但感受好深遠，令我更意識到自己有幾幸福，更有動力幫助更多人。」
Jace希望下次探訪可拉攏Tyson Yoshi同行：「雖然佢係有錢仔，但好有影響力，我好欣賞佢貼地又有同理心。既然佢資金雄厚，出一分力影響力會更大。而且以佢身形，唔打得都睇得，有咩事可以保護我，啲女仔見到佢又開心！」她大笑預言Tyson一定粗口橫飛：「尤其行入嗰個滿佈屎堆的廁所，佢啲粗口一定多過入面嘅昆蟲同細菌！哈！好彩當地人聽唔明。」
