Lucy穿夏日姊妹裝底衫凸腩鬥可愛 Sucy搶家姊風頭轉10款表情包完勝

更新時間：15:30 2023-06-08
發佈時間：15:30 2023-06-08

47歲的李璨琛（Sam）與太太梁志瑩（Sophia）日前為2月出世的細女李斐斐（Sucy）舉行百日宴，一家四口上台切蛋糕，場面好熱鬧。Sucy已經出世3個月，面對Lucy媽的日夜訓練，似乎盡得家姐Lucy的真傳，面對鏡頭唔怕醜，仲要表情多多，要出個表情包套餐毫無難度。昨日（7日）Lucy的社交網分享兩姊妹穿上底衫的「姊妹裝」，而且鬥換表情，未夠1日吸引5.7萬人按讚。

【點擊睇Lucy姊妹演繹10種表情包】：

Lucy媽寫道：「夏天來了，兩姊妹已經加入底衫俱樂部 #呢組相老母想無限點讚 #開頭妹妹未能進入狀態 #到最後家姐笑仲要妹妹都識望鏡頭笑 #實在是太正了」，相中的Lucy與Sucy雖然穿上極為相似的白色吊帶底初，但Lucy的款項多一條花邊，是她近年來所穿的款式。二人穿上的底衫亦相當緊身，將肚腩仔原形畢露，增加可愛度。不少圈中人見到都讚兩姊妹好可愛，而佘詩曼更笑指Sucy似男仔：「好似攬住個細佬」，網民對Sucy變換表情更感驚喜：「第2張妹妹個樣嬲到」、「阿妹完美演繹喜怒哀樂同呆，好正呀」、「妹妹好叻喎！表情十足，同家姐好夾」、「好有戲」等。

兩姊妹穿同系列已非第一次，日前Sucy在百日宴上的打扮，正是接手Lucy的舊衫，是Lucy當年在百日宴上穿的同一件，Lucy媽為囡囡打扮後，還發現Sucy比Lucy更大隻，笑言家中有兩個「腫李」：「唔記得咗講妹妹同家姐喺百日宴都係着返同一款衫，嘻嘻！睇返啲相發現妹妹原來仲腫脹過家姐，屋企又多一個腫李，晚晚都真係歡樂滿東華」。