「大食女神」首談被捕事件 曾涉偷雞飯稱受情緒困擾 自爆有私密照外流：拎我啲相去賣
發佈時間：12:00 2025-05-09 HKT
ViuTV節目《晚吹 – 怨女俱樂部》日前播出的一集，邀請了「大食女神」雪兒（Suet E）擔任嘉賓，雪兒在2023年曾因在元朗涉嫌偷雞飯而被捕，事隔2年，雪兒首度回應事件，她坦言當時因為情緒問題而並非「窮到冇錢食飯」：「開心就食，唔開心又食，食嘢變咗我發洩壓力嘅方法。」
雪兒性感暴露相流出情緒陷谷底
當日雪兒情緒陷入谷底，原來與早年做模特兒不快經歷有關。雪兒稱剛入行初初被一個商業攝影師睇中，對方讚自己有潛質，大家合作影了多相都很滿意，直到第三次影相時，攝影師哄她影一些比較性感、暴露嘅相並說「隨意啲影無問題」，結果年少無知的雪兒信以為真，最後這輯相片竟然在網上流出，甚至可能被人用來搵錢！
相關閱讀：千色匯涉偷雞飯牛奶女身份曝光！性感KOL曾出寫真與莊韻澄同場 早前流出裸照報警稱受騙
雪兒年少無知誤送甜言陷人生谷底：
雪兒有勇氣重新面對「雞飯」事件
昨日（8日）雪兒在IG撰長文，感謝ViuTV令到她有勇氣重新面對「雞飯」呢件事，同時希望藉着自己的經歷，提醒女生「唔好輕易信人」。雪兒說‧：「五年前初初接觸攝影，做model被攝，受到合作過兩次嘅攝影師不斷遊説拍攝私密照，『私處會透過燈光陰影遮蓋』、『照片唔會外流』、『淨係俾你自己留倩影』。但結果並非如此，直至我開始較多人認識，竟然私下拎我啲相去賣，最後流岀到去討論區，受到好多網民對我身體嘅評論同言語攻擊。就算曾經報警都冇用，攝影師同賣我啲相嘅人仍然逍遙法外。」雪兒坦言當刻感到很驚和無助，同時亦受到海量的DM騷擾：「嗰個時期我完全唔敢見人，逃避每個人嘅眼神，覺得全世界都睇過我嘅相，簡直生不如死。我嘅情緒同壓力都已經到崩潰嘅狀態，唯有靠暴飲暴食先緩解到少少，每日就係食同喊，食到攰就瞓覺，然後起身再食。直到有一日，我同家人因呢輯相爭執，腦海一片混亂，完全失去理智同判斷力，然後就發生咗所講嘅『雞飯事件』。呢件事毫無疑問係我嘅錯，我都承受咗法律責任，好好彩經家人、朋友嘅陪伴同鼓勵，接受咗心理治療，克服咗最難過嘅時刻。」
雪兒用親身經歷提醒大家
雪兒續說：「我打咁大篇嘢，唔係想追究啲乜嘢，或者推卸責任賴自己心情唔好，而我係想藉住呢個節目呢個機會，用發生係我親身嘅經歷提醒大家『唔好輕易信人』，影完相一定要check相，有咩唔對路即del。有情緒問題，有咩唔開心一定要同人傾訴，自己鬱鬱埋埋真係會爆煲，同時希望大家都關心一吓身邊朋友嘅情緒，有時俾一個簡單嘅擁抱，都差好遠。」她又稱：「嗰啲相好醜，我自己都唔想再見到，要啲相永遠消失係冇乜可能，相變唔到，但人係可以改變！可以變得更好！而家嘅我已經唔係相中嘅我！積極改變自己，同時學習處理壓力同自己嘅情緒。有時間畀自己胡思亂想，不如增值自己同做更多有意義嘅事，做多啲慈善幫助有困難嘅人同流浪貓狗。最後要多謝大家嘅支持同鼓勵，我先可以企返岀嚟拍片，感恩大家鍾意睇我食嘢。每次喺街被觀眾認得話好鍾意睇我啲片，我都好開心、好欣慰。我唔知我可以走到幾遠，至少呢刻我好希望可以繼續帶歡樂畀大家。」
