李泳豪 反擊阿哥錄音指控因鼎爺不斷俾錢才忟憎
發佈時間：03:00 2026-05-10 HKT
李家鼎（鼎爺）前妻施明於3月離世，之後就爆出一對雙胞胎兒子李泳漢及李泳豪的爭產風波，繼鼎爺日前公開被大仔李泳漢苛索金錢的電話錄音後，李泳漢亦公開錄音反擊，指責胞弟李泳豪不尊重並軟禁父親，而李泳豪獨家回覆《星島頭條》解釋指哥哥李泳漢經常問父親攞錢，因此他們要睇住父親，但父親又唔聽，所以對話語氣才會忟憎，之後他更還原太太的完整錄音護妻。
鼎爺近日公開電話錄音，踢爆被大仔李泳漢當成「人肉提款機」，對方更以「高中學歷都冇」為由，理直氣壯做無業漢、不斷向父親索取金錢，而李泳漢亦隨即公開錄音，反擊細佬李泳豪對父親不尊重，更揭父親被李泳豪軟禁，又被李泳豪夫婦言語恐嚇等，甚至掌控其銀行戶口及限制其人身自由。對此，李泳豪獨家回覆《星島頭條》，語氣平靜地說：「我冇錄音喎，我唔知點解啲人鍾意咁樣錄低，因為阿漢成日問阿爺（鼎爺）攞錢，攞到我哋都要睇住啲數，唔俾錢阿漢，阿爺又唔聽，有陣時言談之間就會忟憎囉，就咁簡單！至於我太太段錄音，都係要幫阿爺計住，一個老人家生活費用好少，點解用咁多錢？大前提都係唔想佢再俾咁多錢阿漢，可能言談間真係會有一啲咁嘅說話。」
至於太太Agnes被哥哥李泳漢針對，李泳豪亦回覆傳媒為愛妻解話，提到錄音中太太語氣粗魯，指鼎爺在5個月內用了16.6萬元，平均每月花費約3.3萬元，李泳豪解釋當時因為鼎爺的帳目混亂：「幾十萬幾十萬咁俾，條數太亂，講極唔聽，所以忟憎就係咁簡單。我太太覺得唔正常，一個老人家點解會使咁多錢？所以逐條數對返！」此外，泳豪指哥哥公開太太Agnes的錄音故意刪除重點，並提供完整版本還原真相，當中太太Agnes說到：「總之我做新抱，淨係幫你睇住條數，你一個人燈油火蠟都用唔到75萬，但你轉咗75萬俾人，你唔好再話冇，啲錢留返自己用！」
家燕姐讚泳豪人緣好
至於肥媽昨日出席活動，提到李泳漢聲稱自己45歲學歷又低、找不到工作，肥媽以自己作比較，坦言自己6年班都未畢業：「伸吓手就有，仲要鬧佢，話攞個屋契去按，咁嘅說話，係咪人嚟㗎！」另一邊廂，薛家燕昨日出席慈善活動，坦言不認識李家兩兄弟，不過在TVB會遇到泳豪，覺得對方為人有禮貌、人緣不錯，又坦言：「泳漢話搵唔到嘢做，其實只要肯做唔會話搵唔到。」提到泳漢指鼎爺被泳豪夫婦軟禁及經濟封鎖，家燕認為不會，應該會有積蓄；至於泳漢提供的片段中，鼎爺承認泳豪不讓他外出，家燕姐笑說：「我諗佢係一個藉口，佢唔想出嚟就真！」
