伊健報答Kelly 「神聖之手」恩情

更新時間：03:00 2025-07-28 HKT
發佈時間：03:00 2025-07-28 HKT

《陳慧琳Season 2萬人結界演唱會》前晚（26日）來到第9場，驚喜邀請到鄭伊健做嘉賓，兩人除了深情合唱外，伊健更大爆當年拍戲獲Kelly伸出「神聖之手」相助，又搞笑揭對方當年平安膏傍身，同形象唔多襯。
這晚Kelly驚喜邀請到電影好拍檔鄭伊健做嘉賓，她介紹伊健上台時透露，對方原定7月20日擔任嘉賓後離港，卻因颱風而延期，最後成功改機票留低。兩人合唱《甘心替代你》後，伊健分享一段鮮為人知的拍戲往事：「拍《東京攻略》（2000年上映）ending時，我要喺零度跳海拍爆炸戲，凍到郁唔到，要等船接，點知突然見到Kelly伸出『神聖之手』！雖然拉唔到我上船，但佢特登走出嚟，呢份心意我一直記得！」並直言感覺溫暖，而Kelly聽完即大笑：「真係全靠隻手！」
收平安膏感動又搞笑
隨後伊健繼續爆料，指當時拍動作戲搞到肌肉撕裂，Kelly竟然送了一盒粉紅色平安膏給自己，雖然令他覺得好感動，但就笑指「真係唔多襯佢形象」，Kelly聽後即時反擊：「以前出埠最鍾意帶嘛！我同你合作多數喺海外，《東京攻略》喺東京、《幻影特工》喺馬來西亞、《盜馬記》喺布拉格，仲有30年前澳洲演唱會，所以今日專登着西芹裙歡迎你！」伊健卻笑佢似「Big Bird」，又爆《甘心替代你》係自己首次同人合唱，嚇到Kelly瞪大眼：「真㗎？」而在Kelly換衫期間，伊健就演唱《發現》，現場反應熱烈。

↓立即下載星島頭條App↓