王丹妮羅孝勇拍嗌交戲嚇驚製作組

更新時間：03:00 2022-09-17 HKT
發佈時間：03:00 2022-09-17 HKT

（星島日報報道）王丹妮（Louise）昨日到金鐘出席眼部護膚品活動，最近她和老公羅孝勇以夫妻檔拍攝黎明的新歌《一生幸福》MV，片中不少夫妻吵架戲分，她笑言當時和老公好投入拍攝，二人好戲到令工作人員以為真吵，其實二人很少鬧交。
Louise在活動上笑指平日也會幫老公羅孝勇搽眼霜保養。提到二人首次以夫妻檔上陣，為黎明新歌《一生幸福》拍MV，不過MV中卻有不少吵架場面，而且更鬧到七情上面，問到MV中的情節是否反映兩夫婦的日常生活？Louise笑指沒那麼誇張：「我哋演嘅時候好激動，幕後製作團隊好驚，以為我哋真係鬧交，我哋只不過係好投入，之後一Cut機我哋即時嘻嘻哈哈，其實我哋平時好少鬧交。」Louise又指今次能跟老公一起拍這類型的MV，覺得好難得及開心：「講兩個人嘅關係，愛情點樣萌芽相處同經歷摩擦，係每對情侶拍拖必經階段，首歌係傳達一個愛嘅訊息，尤其疫情下更加需要呢種支持，好多情侶因為疫情而搞唔到婚禮或者多爭拗，要互相體諒、明白同欣賞對方，鬧交之後要諗返最初點解一齊，冇理由因為一次鬧交而破壞咗，咁兩個人嘅愛情先可以恆久。」
將跟老公分隔兩地
Louise於本周日即將起程到歐洲參加時裝周，雖然老公會在港照顧女兒，但因隔離關係，以致二人見不到對方：「完全見唔到佢，唯有等下一個大假期，聖誕或新年，佢再返嚟香港。（長期要分隔兩地？）我哋以前成日黐到實，現在大家都成熟，好信任同支持對方，精神上支持同愛是更加重要，會更珍惜相處時間。」