Happy New Year! 民間煙花 Show

UK_nottsMama

移英港媽生活分享

2022-01-03 04:38 HKT

生活專欄

內容

在英國，其實非特別日子都可以放煙花，好似生日呀、周年紀念呀、求婚呀相信都係放煙花的藉口，又一年有幾個日子大條道理可以放煙花，11月頭的 Bon Fire Night 是其一，其他日子還包括印度的 Diwali Festival、除夕和中國農曆新年。每年15/10 至10/11、26-31/12 及 Diwali、中國農曆年前 3 日都可以買到煙花，11月時就見過firework pop up store 外，各大超市都有煙花售賣，唔少人都係嗰時入定貨。

Covid 期間，大型除夕倒數煙花匯演大概只剩倫敦 London Eye，睇 BBC 片段，盛況同初二維港煙花有得揮。不過，民間煙花同樣熱鬧，早場由晚上八九點起，已經聽到附近傳來 bang bang bang 聲 (初到埗唔知以為係槍聲俾佢嚇親)，到 12 點前後十分鐘，前前後後，遠遠近近，四方都傳來煙花聲，身在家中都可以欣賞到，好熱鬧！要讚煙花的standard 其實幾高，雖則唔能夠同躉船貨色相比，但係同廸廸尼又唔差好遠噃 (要睇片呀！)，真心靚！Bonfire Night 時我地都入咗少少貨，今個除夕同農曆年都有得趁下熱鬧，買過又放過幾次煙花，絕對認同放煙花係燒錢的玩意，三四十英鎊幾分鐘就放完，手機拍得來眼睛又享受唔切 ~

講番民間放煙花都有啲規矩要follow，好像基本上只可以在私人地方進行，所以唔好諗住帶埋啲煙花去公園同朋友仔一齊放，只可以在屋前或者後花園進行。另外時間上，除了以上提過的 Bonfire Night、Diwali、除夕新年可以放煙花至凌晨 12 點甚至 1 點，其他日子係唔可以於 11pm 至 7am 放。而某些被列為級別 2 同 3 的煙花，就只可出售予 18 歲以上成人。