初嚐佐敦海鮮鐵板燒 海膽達人不計成本做好美食
飲食︱美妝︱玩樂︱星島 New Media 主播
2021-12-16 12:53 HKT
字體大小
啱啱過咗食大閘蟹最黃金嘅日子，食過唔少大閘蟹宴，其中令我念念不忘，一定係位於佐敦嘅鐵板燒店「樂Teppanyaki」推出嘅大閘蟹餐。
逾20年鐵板燒經驗兼有海膽達人之稱嘅樂師傅推出全港首創9道菜和式鐵板冰火大閘蟹餐，樂師傅嚴選來自江蘇的大閘蟹公，製作新鮮及肉質飽滿的大閘蟹餐。
一邊品嚐每一道菜，一邊了解樂師傅設計這餐單嘅心得同埋煮食同貼士，感受到佢對鐵板燒嘅熱愛。「花膠扒要凍水浸先會爽口、熟海膽要好有技巧處理先唔會腥、波士頓龍蝦夠厚肉，最啱用嚟做鐵板燒......」
由於海鮮嘅價格成日浮動，點解樂師傅向難度挑戰，店舖主打鐵板燒海鮮？「我唔計較成本，如果計較成本，好難做到海鮮餐！」有時樂師傅發現食材貴咗，分分鐘冇得賺之餘，仲有機會蝕，但佢覺得如果可以做到好味嘅食物，佢都會照入貨。
今次大閘蟹餐將蟹肉和蟹黃融入主菜同主食，包括全港首創嘅冰鎮醬漬8両大閘蟹、非常足料嘅火焰蟹粉甲羅燒、爽口鮮甜嘅蟹粉花膠扒同埋粒粒分明的蟹粉蔥花蛋炒飯等4款點題菜式。
其中冰鎮醬漬8両大閘蟹，特別選用江蘇大閘蟹。樂師傅先將蟹身沖刷乾淨，再將紫蘇葉放啖喺大閘蟹上一齊清蒸，再用大吟釀清酒、檸檬、柚子、花椒同八角等製成自家秘製醬汁泡浸，味道帶甜，更能提升蟹鮮。
「樂師傅，通常做醬漬海鮮都會脫去海鮮嘅外殼，等佢入味啲，點解呢隻蟹唔洗脫殼，都可以咁入味?」我好奇一問，樂師傅：「好食呢？當然有秘訣啦！」
食過咁足料嘅大閘蟹餐，唇齒留香之餘，更重要係可以「以食會友」，認識咗一位對煮食充滿熱誠同執著嘅大廚，令我十分佩服。
最Hit
更多文章
