Cally - 香港應科院與斯洛伐克科學院 簽署合作備忘錄 加強創新科技合作 | 商界講呢啲
Cally
3小時前
字體大小
香港應用科技研究院（應科院）早前連同香港駐柏林經濟貿易辦事處、香港生產力促進局、香港科技園公司及香港貿易發展局嘅高層代表訪問斯洛伐克，喺上周二（9月16日）同斯洛伐克科學院簽署合作備忘錄，共同推動創新科技合作，標誌住兩地喺科研及技術交流邁出重要一步；期間，亦同當地企業會面，探討潛在合作機會。
是次簽署儀式由斯洛伐克副總理辦公室與斯洛伐克共和國駐香港名譽領事館聯合籌備，應科院高層代表及香港創科生態圈其他持份者都有參與，雙方就有關研究、人員交流及科技應用等範疇訂立框架，加強兩地科研合作，不但展示出香港嘅創新實力，仲藉此發掘「一帶一路」嘅新機遇。
應科院董事局主席李惠光工程師表示：「呢次合作充份體現香港作為國際創新樞紐嘅定位，與斯洛伐克嘅數碼轉型策略相輔相成。透過匯聚雙方優勢，我哋將加速技術應用、把研究成果轉化為市場可行嘅解決方案，並為未來培育更多創科人才。」
代表團其後亦喺9月17日出席斯洛伐克科技論壇暨博覽會開幕典禮，會上應科院董事局主席李惠光工程師就「政府與私營機構合作提升經濟創新」發言，而應科院首席科技官黃莹博士參與咗「香港創新論壇」。兩位講者重點介紹香港嘅創科生態圈，並分享應科院嘅科研成果及成功案例。
最Hit
更多文章
