胡慧沖 - 肥黑師兄是誰？ | 筆泰沖動

筆泰沖動

胡慧沖

2025-05-16 02:00 HKT

生活專欄

內容

　　有留意我社交媒體應該會發覺，近幾個月自己出鏡經常會穿着某個獨特造型人物嘅衫，甚至乎去澳門國際旅遊博覽都有唱一首新歌，歌名叫做《來吧，肥黑師兄》！

　　肥黑師兄係邊位？其實係小弟去年忽發奇想而創作嘅一個人物，佢本身就係幪面超人世界入面嘅壞蛋戰鬥員「嘰嘰」，一生只係識得恰小朋友、傷害人類，因而被幪面超人教訓一餐。某日嘰嘰開始懷疑人生，問自己「點解條命會咁苦？」於是乎決定到泰國去旅行散心。正所謂Amazing Thailand，來到泰國當地人又好，而且食好住好，結果嘰嘰由瘦仔變成肥仔。有一日佢去佛寺見到一位和尚，繼而受到和尚感化，教佢以後要做個好人，帶歡樂畀大家，仲幫佢起個法號——肥黑師兄。

　　故事大致就係咁，可以話係二次創作，我仲搵咗位泰國設計師幫手設計一系列圖案。估唔到肯花錢先會有好成果，身邊嘅泰國朋友同香港朋友都對創作成品表示欣賞。最初只不過諗住設計出來自己玩、自己着用，點知泰國朋友竟然覺得有商機，仲投資製成商品，而家喺泰國曼谷有一個商場有售，遲啲其他地方都會有，譬如下星期鑽石山荷里活廣場嘅泰國節，同埋下個月會展嘅香港國際旅遊展，我都會攞有關商品返來賣，希望大家會欣賞。

　　經常講呢啲小生意小創作唔會發達，勝在創作過程好開心，尤其是得到朋友支持。每年泰國節、旅遊展都有唔少粉絲到來，希望今次除咗玩遊戲贏取機票住宿之外，都會有人有興趣支持一下，賣嘅唔係甚麼貴價嘢，但從中可以得到好大滿足感！人生在世，冇嘢開心得過呢種滿足，等於自己節目嘅主題曲或插曲，偶爾有人同你講「我識唱，唱幾句你聽吖！」作為一個非專業歌手，自己作嘅歌有人認識，真係無比欣慰！今次產品算多元化，有用來搽嘅「Go膏Let's膏」，亦都有T恤、布袋、絲巾、磁貼、匙扣等等，應有盡有。

胡慧沖