胡慧沖 - 泰國入境新政策 | 筆泰沖動

胡慧沖

17小時前

內容

　　由5月1日開始，任何國籍的外地遊客到泰國旅行，都必須先在網上填寫簡稱TDAC（Thailand Digital Arrival Card）的表格，其實就相當於之前搭飛機時空中服務員派發畀大家填寫的入境表。點解要咁做呢？其實有好多原因，首先第一是現時世界各地不少國家，包括馬來西亞、日本等等，入境當地前都要填寫類似的表格，泰國當局跟大趨勢都無可厚非。第二是慎防一些身份可疑，或者動機不明的人，例如有些聲稱好鍾意泰國，頻繁地每個月都來泰國一次，甚至乎1月31日離境，隔天又再次入境，當局絕對有機會懷疑是否到來做黑工，為更有效杜絕這些事情，便出現了上述新措施。

　　當然總會有些遊客覺得好麻煩，甚至有網民表示不如索性唔去了，但好老實講，如果鍾意一個地方的話，就算更麻煩都唔會阻止到你去。等於我每年去日本，出發之前都會做填寫入境審查表格這個動作，都唔會怕麻煩，反正都係一年一至兩次，正所謂入鄉隨俗，跟大趨勢都係要咁做。同埋提一提大家，要在入境之前三日內在網上填好表格獲取QR碼，然後抵達時向海關出示就可以入境，基本上問題不大。

　　都係嗰句，行得正企得正，哪怕填多幾個字呢？所以大家都唔需要過分擔心。

胡慧沖