KellyChu - 身為業主挺租客 黃光耀撐小店 拿手反沙芋勁正 | Executive日記
KellyChu
2024-05-03 02:00
字體大小
會德豐地產副主席兼常務董事黃光耀投資有道，又識享受生活，常下廚為朋友製造驚喜，日前佢邀請咗一班同事和傳媒朋友食大餐，品嘗出色嘅潮汕滷鵝，仲親自煮咗碟反沙芋作為壓軸美食，大家食得津津有味，大飽口福。
黃總選擇喺太子「和昌潮汕滷鵝」開餐，唔講唔知，間舖係黃總嘅，原來佢經常幫襯返自己嘅租客，真係一個好業主，佢大讚和昌出品嘅潮州美食非常出色，值得支持，自己經常來買外賣，好似一款慢煮牛面，又腍又和味，小妹試一件即刻愛上。黃總教路，買外賣返屋企，煮個公仔麵，放件慢煮牛面，就係一餐超級美食。和昌出名滷鵝，大家一次過試曬佢哋嘅鵝頭、鵝頸、鵝肝、鵝肉同鵝腸，好味到暈。
小妹最愛鵝頸，軟腍入味，滷得非常之好，令人回味無窮，餐廳亦提供多款手工菜，其中鴛鴦蟹最為出眾，兩隻蟹蓋分別釀入豬肉豆蓉以及豬肉咸蛋，圍滿碟邊嘅蟹鉗又鮮甜多肉，菜色豐富滋味。
黃總最後端出親手炮製嘅潮州甜點反沙芋，小妹知道反沙芋好考功夫，可見黃總手藝無得頂，佢分享秘訣話，反沙芋做得成功與否，最緊要睇芋頭靚唔靚，多謝黃總又靚又甜嘅反沙芋！
KellyChu
更多文章
