KellyChu - 港鐵香港站變奇幻世界 Mr Doodle即席塗鴉飛碟｜Executive日記
KellyChu
2023-11-20 00:00
字體大小
蜚聲國際嘅英國鬼才藝術家Mr Doodle「塗鴉先生」，近日來港周圍畫畫，引起哄動。昨日佢去到港鐵香港站，為一隻太空船繪畫圖案，仲邀請協助病童嘅非牟利慈善團體「願望成真基金」數名小朋友，一起創作，感受同分享呢位藝術家發放嘅正能量。
好多粉絲聞訊，一早到香港站圍觀，Kelly亦在人群中，見到Mr Doodle開心嘅笑容，揸住大筆，喺一隻銀色太空船上不停咁畫，不一會就畫出好多有趣嘅圖案。Mr Doodle對Kelly話，做你鍾意做嘅事，不求大意義，不理他人眼光，自己開心就OK，人哋開心更加好。佢動筆前都唔知自己想畫乜，但畫下畫下就成就一個天馬行空嘅小宇宙。
呢次港鐵喺站內破天荒最大型嘅即席藝術創作表演，大家即日起至十二月三日行經香港站嘅「港鐵藝術舞臺」，就可以欣賞到呢隻咁別致嘅太空船。
港鐵公司企業事務及品牌總監蔡少綿話，Mr Doodle呢次喺香港站創作嘅太空船主題展覽，把歡樂同創意力量嘅藝術氛圍帶到車站每個角落，為本地市民同旅客嘅鐵路旅程帶來驚喜，感受箇中快樂。展覽完結後，Mr Doodle嘅塗鴉太空船藝術品將捐贈予「願望成真基金」，以支持本地兒童慈善工作。
Kelly Chu
更多文章
