陸蕙華 - 端午節快樂｜營爆生活

陸蕙華

2023-06-15 00:00

內容

端午節少不了食糉，但你又知唔知點先食得健康？一般傳統鹹肉糉係用糯米再配上高脂食材如：五花腩、臘肉製成。一個中型鹹肉糉大概含有相等於3至4茶匙油分，部份鹹肉糉更加入金華火腿、鹹蛋黃等高鈉（鹽）加工食材，進食過多會增加患上高血壓同心血管疾病嘅風險。

豆沙糉無肥肉又係咪較健康？以同等份量豆沙糉而言，雖然總脂肪含量較鹹肉糉低，但碳水化合物同糖份含量較高，所以整體熱量大致相約。

「我明……但我都真係想食應下節，應該點食好啲？」
1　留意份量，少食多滋味：

糉嘅碳水化合物含量偏高，建議可於正餐代替餐膳的主食（飯/麵/根莖蔬菜）。實際可以食幾多就要視乎個人餐單，一般成年人建議每次最多食半隻中型糉。
2　配上蔬菜一起吃：

糉嘅膳食纖維含量較低，當中糯米亦屬高升糖指數食物。建議配碗灼菜一齊食，有助增加膳食纖維，緩延血糖上升速度。
3　減少添加額外調味料：

糉嘅鈉同糖含量較高，食嘅時候避免額外沾砂糖或豉油。　

4　食完糉散個步幫助消化，更能趁機消耗熱量！

有興趣自製棕就可以試下用瘦肉、去皮雞肉取代臘肉、五花腩；加入瑤柱、蝦米、蓮子、栗子、冬菇代替金華火腿、鹹蛋黃、臘肉等加工食材，有助減低鈉含量；以綠豆、腰豆、紅豆、眉豆、紅米、藜麥、麥米取代部份糯米，可以增加膳食纖維含量，增加飽腹感同時維持腸道健康。大家不防試試啦！
陸蕙華