頭條戲場 - 《F1電影》感受320km/h | 頭條戲場
就算你喺屋企砌咗間「影院」（更遑論我只係睇10幾吋iPad串流），《F1電影》這類以賽車競技為題材，製作費16億港元的鉅作，真係要入戲院欣賞（最低門檻睇香港「IMAX」），隔住個mon感受322km/h陸上速度帶來的官能刺激同埋引擎咆哮的震撼！ （現正上映） 撰文︰華朗
稍早時間，畢彼特（Brad Pitt）主演的《F1電影》在倫敦舉行首映，湯告魯斯（Tom Cruise）撐場，兩人攬攬；他們合作《吸血迷情》（1994年）後屢傳不和，至於呢一攬，係咪泯恩仇，我唔care，反而意識形態、象徵意義大於一切。
觀眾回流戲院
湯告魯斯任重道遠，疫情後憑《壯志凌雲：獨行俠》吸引觀眾再入戲院（全球票房吸近15億美元），為復興電影業仆心仆命。《F1》算是第2波行動，該片導演正是《獨行俠》的Joseph Kosinski，都係玩速度，sell電影技術的飛躍——《獨行俠》有幕主角駕駛Darkstar加速至突破10馬赫，《F1》畢彼特揸二級方程式賽車，620匹，322km/h，為了感受那激情與澎湃，我朋友就睇咗《獨行俠》9次（本人3次），《F1》絕對值得二刷。
除速度外，《F1》和《獨行俠》相似之處，主角都係不按常理出牌，都係年輕人眼中的「老屎忽」，另一邊初生之犢，其實大家都有自己一套㗎嘞，難相處，睇吓點樣搵平衡點，將1+1大過2。導演以實拍見稱，61歲的畢彼特冇揸流攤，其角色人設，退休後重返賽場指導新星，見佢坐落車廂狹小空間跑賽道，一圈又一圈，有車手大頭扭曲表情，有第一身視角逢車過車的快感；如果你唔熟賽車規則，或者對引擎轟隆作響感到厭煩，本片都有描述作戰策略、商場手段等戲碼。美中不足之處，真的太集中畢彼特身上，其所屬車隊APXGP每每處於上風，冇咩壓力，皆因對手無還擊之力，而幾位客串的著名車手真係只有「客串」，得個名出現一下，無對戰功能。
頭條戲場
