頭條戲場 - 《大偽術師》越爛嘅牌 就越要畀心機打｜頭條戲場
頭條戲場
2023-09-29 00:00
字體大小
電影由德國演員Louis Hofmann做男主角，睇過電影《十個拆彈的少年》同Netflix科幻驚慄「燒腦神劇」《闇》，對佢極有印象，靚仔仲要識做戲，已經要加佢幾千分，加上一向沉迷二戰電影，有fans濾鏡所以覺得呢套戲幾好睇。電影根據二戰傳奇護照偽造師Samson Cioma Schonhaus的事跡改編，冇non stop槍林彈雨，可歌可泣的生離死別鏡頭亦欠奉，主要睇靚仔Cioma如何自信滿滿地偽造護照，暗中協助超過300名猶太同胞，避過納粹黨視線逃離柏林！（上映中） 撰文：廖思慧
我覺得Louis Hofmann好正，但德國金像獎導演Maggie Peren唔係咁睇，第一次試鏡後覺得對方正投入拍攝《闇》，所以又dark又憂鬱，因為同戲中角色的氣質完全唔似而唔想用佢，直到第二次試鏡先徹底改觀，至第三次才認定Louis是主角人選，好彩咋。
機智又勇敢
Cioma自細從白俄羅斯移民到柏林，因為擁有極高藝術天分被送到藝術學校就讀。後來納粹黨侵略周邊歐洲國家，直接引發第二次世界大戰，更開始屠殺猶太人，Cioma被逼放棄學業更要投入製造武器換取糧票，之後更有機會憑住一雙巧手同藝術天賦，加入地下組織幫猶太人偽造護照逃亡。父母朋友全部被捉去集中營，亂世中死唔去，條命都叫做生得好，加上膽大心細成日笑，夠薑冒充納粹海軍入夜場又食又飲仲要媾埋女，又識得趁被抄家前變賣家具賺返啲零用錢，佢係成功做到越爛嘅牌就越要畀心機打，仲要打得幾好。
電影冇一般二戰電影咁沉重，但壓逼感仍然好強，Cioma親眼見老友Det Kassriel（Jonathan Berlin飾）被捉，直入集中營，道別都無機會講，只能下世見。從Cioma的日常生活，完全睇到一個猶太人在納粹極權下嘅生活有幾咁水深火熱，要逆境求存只能靠自己。
更多文章
