阿碌開咪｜二手飯，二手餸

名家合集

《名家合集》收錄名人文章，分享觀點，探討時事。

2022-03-31 09:57 HKT

時評專欄

內容

經濟下行，疫情未散，失業率當然高企。反映在市面，正是拉閘鋪處處，家家求租求售。

另一景象，是兩餸飯店開到嘭嘭聲。一切一切，反映現實慘況，正是不少打工仔食唔起昔日「正常價」的一餐，唯有粗粗哋食大圍飯。

有報章A1頭版凸顯有人在Food Court食二手飯，即別人食剩的飯，佢趁侍應未執枱，一個前步標埋去吞咗先。我睇睇食二手飯者，身材高大，五官正常，二十幾三十歲，點解搞成咁，無法明白。因為有留意就業市場者應知，如今雖云失業率升，但若大家睇睇排山倒海而出的求職廣告，就知仍有萬計「非技術工」冇人做。我日日周街踱，也見大量鋪頭及大廈外圍貼着「高薪」請侍應、清潔、保安、物流、外賣……

飲食業老友更揚言，四月大部分食肆開返，又要搶人矣。如此環境，再加有綜援及失業津貼，食二手飯者背後有乜故事，我也好想知。

食二手飯，如今是「頭條新聞」。但在小弟長大年代，根本是閒事一宗。

上世紀六十年代，名校如聖若瑟書院，也有學生「堂堂正正」食二手飯。那年代，窮人眾多，就算入讀名校者，也有不少住在木屋區、板間房、徙置區（當年稱號）。父母搵朝唔得晚，所以，只夠錢畀阿仔食麵包或白飯（我也是餐餐一碗白飯加幾粒花生及蘿蔔加豉油）。人人都窮，不以為苦。碰啱想儲起幾蚊買其他野（例如波板或足球），咁點呢？咪食同學二手飯囉。當年大家都唔介意，也沒有甚麼衞生意識。事實，汽水也是一人一啖，飲或食人「口水尾」，根本毋須大驚小怪。

還有，一般貧苦家庭，去飲宴簡直是個夢，咁有乜方法一嘗當中美食？

有！凡宴會，必有客人食剩餸菜，員工不浪費，後門賣給小販，再分成一份份，拿到街市擺地攤叫賣，名「雜水」。每份一蚊至五蚊，有蝦有魚有雞有乳豬（當然並非好的部分）。

二手餸，乃當年我家有特別喜事時的「加餸」。

曾智華

阿碌開咪

兩餸飯店門外不時大排長龍。資料圖片