【阿碌開咪】張建宗也是「彼得」

名家合集

《名家合集》收錄名人文章，分享觀點，探討時事。

2020-12-25 08:45 HKT

時評專欄

內容

一石激起幾重（冇千重咁誇張）浪。周初本欄的《最受/不受歡迎上司》，指出林鄭中正「彼得原理」，升到一個無法勝任位置，再加客觀形勢惡劣，結果鬧出「管治悲劇」，民望插到歷史紀錄，接近一半市民畀佢零分，如今「彼此也在捱」。

「捱」到幾時？冇人知，總之愈短愈好啦！

篇文章在政府高層火速傳閱，不但現職公務員有興趣，連退休高官亦深有同感。

前頂級高官「勁人S」（當然假名）來電：「碌Sir，你真係一矢中的。其實邊止林鄭吖，連政務司司長張建宗，也是百分百『彼得』。資深公務員，尤其首長級的，邊個會唔知Matthew有幾多料吖，本來做個部門署長已幾盡，結果都唔知邊個嘅錯，升下升下，升到做政務司司長。其實佢未上任，成棚舊同袍都知必大鑊！Matthew點頂到個位的要求，更弊，又係眾所周知，林鄭根本唔妥佢。喂，兩個香港手握最高權力者皆中晒『彼得原理』，更未能一條心，搞到個局散晒，是正常，非反常呀！」

不少市民可能不太清楚特首與政務司司長的分工，其實政務司司長非常大權，理論上，所有出政府糧的（不包括律政司司長、財政司司長及法院法官），即所有公職人員，皆佢下屬，有需要時，可以按情況作部署。

政府對抗疫情等於打仗，人人理解。咁邊個應該係總司令？當然是政務司司長，因佢有成二十萬大軍可以調動！

但搞到今時今日，大家可有見到張司長有履行權力及責任，進入角色？完全冇！

究竟係特首做咗佢嗰份，定係張建宗施展最拿手的「泥鰍功」（你懂嗎？）呢？官場人個個心知肚明，總之就是同聲一歎，望今屆政府早日收工，因已經「冇得搞」！

呢點，現/前任高官皆知，「阿爺」又豈會唔知？究竟接下來可有「果斷安排」，或任得佢「磨爛蓆」式拖個天長地久呢？香港人冇權，只得個睇字！

曾智華

阿碌開咪

政務司司長張建宗。資料圖片