【阿碌開咪】「白果潘」終於扎醒
《名家合集》收錄名人文章，分享觀點，探討時事。
2020-12-12 08:36 HKT
字體大小
疫情籠罩香港，市民一片低氣壓。呢種環境，若冇活動沖喜一下，肯定好多市民會變抑鬱。
咁啦，無論你喜歡賽馬與否，星期日都通過電視屏幕，為香港隊打打氣啦。香港馬會的管理，冇得唔服，疫情如此嚴重，仍可處理得頭頭是道，乜都停，唯獨賽馬冇停，呢方面真係獨步全球馬壇。
明天乃一年一度馬圈最重要盛事《香港國際賽事》，雖然唔准入場，但仍可舉行，已是天大喜訊，令「禁足」在家者，可開開心心看本土騎練及馬匹如何為港爭光。
早前小弟在本欄揶揄上屆冠軍騎師潘頓為「白果潘」，因兩個月內多次夢遊馬場，頻頻大熱倒灶。作為「專業運動員」，表現絕對不可接受，因冇晒「專業性」及「穩定性」。
哈，真係頂佢頭槌，呢丁友仔一到周三《國際騎師錦標》，見世界殿堂級高手來臨，同場比併，真係講都唔信，突然全面變正常，有返晒冠軍風範，呢種忽龍忽蟲表現，真係鬧得少！
周三晚令馬迷大喜，乃本土騎師梁家俊超水準演出，犀利，有兩場在外疊如飛殺上勝出，鞭法狠辣，走位機靈，令人眼前一亮。望俊仔繼續維持高水準，努力邁向國際一級水平。
明天興奮死，有四場國際賽。香港人，一定先捧香港隊，然後才到外隊。小弟心水：
一、香港盃——跑二千米，呢場港隊冇得揮嘞，一於鐵三角啦：「野田優驥」、「變魔術」及「樸素無華」啦。「時時精綵」唔跑呢場，擺明怕怕。
二、香港瓶——跑二千四百米。捧兩隻，「時時精綵」及愛爾蘭代表「業界巨頭」，目及 緊「白果潘」出招。
三、香港一哩錦標——跑千六米。「金鎗六十」深不可測未見底，拖「頌讚火星」及「澳國勳章」可也。
四、香港短途錦標——跑千二米。「旺蝦王」擺擂台，拖外隊「野田重擊」及「倫敦塔」。
Hong Kong我愛Hong Kong！小弟從來以做香港人為傲，一於瞓身支持港隊！
曾智華
阿碌開咪
潘頓。
最Hit
旺角襟江酒家｜顏氏蓮香樓後人無懼結業潮 投資700萬家樂坊開7千呎懷舊酒樓 推車仔點心$25起
2025-08-22 18:59 HKT
灣仔靚裝茶居結業！60至80年代港式裝潢+手作點心 開業3年僅剩台北分店 透露3大原因：有心也無力支撐
2025-08-22 16:07 HKT
《勁歌金曲》元祖級主持罕現身 轉行做律師多次為明星打官司 極關心李龍基未婚妻案情
2025-08-21 20:30 HKT
更多文章
