Kelly Online｜李國寶氣場勁獲獎掌聲雷動

港聞

更新時間：02:52 2021-09-29 HKT
發佈時間：02:40 2021-09-29 HKT

乜嘢叫做江湖地位？呢樣嘢係無形無色，如果用中國古老講法，就彷彿有道「氣」，有種「勢」，唔係話你想有就有，係長久累積至可以「修成正果」。昨日，東亞銀行主席李國寶就充分反映佢嗰種江湖地位，同埋呢道「氣」。

話說昨日由銀行學會主辦的香港銀行家峰會有一項頒獎環節，頒發「榮譽銀行專業會士」，有多位資深銀行家獲獎，寶哥哥亦係其中之一。不過，在宣布頒獎給寶哥哥時，現場觀眾掌聲雷動，歷久未衰，把氣氛推至高峰。

本來，個個獲獎銀行家都係行業出類拔萃人物，人人獲獎都得到現場熱烈拍掌祝賀，但到寶哥哥獲獎時，掌聲特別熱烈及持久。寶哥哥一向斯文有禮，亦唔會話要特別出風頭，但佢嗰道「氣場」就自自然然令現場人人肅然起敬，不期然特別大力拍掌。

寶哥哥嘅「氣場」唔單止令觀眾熱烈鼓掌，而且那道「氣」亦令一眾監管機構高層一個個乖乖地留在現場，唔會提早離開。到寶哥哥離場後，監管機構高層才一個個匆匆離開，反映大家對佢老人家極為尊重。