【Juicy叮】秘書走精面印50張白紙遇老闆質問仲駁嘴翌日被炒

港聞

更新時間：16:04 2021-03-16 HKT
發佈時間：13:50 2021-03-15 HKT

職場上總會有不同奇遇事！有網民於討論區發文，指其公司秘書因要50張白紙，為求數量準確，竟然利用影印機列印50張白紙，惟被老闆發現，翌日遭解僱。事件引起網民熱烈討論，有網民分析秘書真正被炒的原因是因為駁嘴。

網民「司馬仲達」昨日在連登討論區上以「公司個秘書因為印白紙俾老闆炒咗」為題發文，講述事件經過，指上周五外籍老闆發現打印機列印出一疊白紙，於是詢問同事，秘書隨即「自首」，表示自己想預備50張空白A4紙作面試用，但「因為唔想數所以直接印出嚟」。

老闆聞言斥責秘書懶惰之餘，又浪費碳粉同電量，惟秘書反駁稱：「呢個係慳水慳力嘅做法」。老闆翌日就在通訊群組指已辭退秘書。

樓主表示行政部人員「都覺得其實個秘書冇做錯」，但有網民解釋「租機逐張計錢㗎喎，如果買嘅機就只係電費支出」，「數都好快啫」、「數50張紙30秒都唔駛」、「從來無諗過用印白紙代替逐張數」，亦人笑謂「好心印就印到單行紙咁」、「點解唔直接拎1疊過去用剩拎返去擺，數都唔使數」。

不過有網民就認為秘書被炒的真正原因，「主要係駁嘴啫，嗰50張Quota值幾錢」、「本身已經係一個秘書有錯，仲要駁個老闆，抵炒啦」，又教「講句Sorry，唔小心撳錯咗，咁咪無嘢囉」。