Kelly Online:強迫分享玩具? 男童拒借畀陌生人反遭對方嘲諷

港聞

更新時間：17:31 2019-01-14 HKT
發佈時間：15:56 2019-01-14 HKT

唔少家長都有帶小朋友公園玩，通常小朋友都會拎埋玩具去玩，不過如果有個陌生家長問你嘅小朋友拎玩具玩，你會唔會借？日前Facebook群組「生仔要考牌系列」一名港媽開po抱怨遇到極厚面皮嘅怪獸家長，要求囝囝將玩具電動車借畀佢小朋友玩，當囝囝拒絕時，反遭該家長冷嘲熱諷，話「人哋唔分享都冇辦法㗎！」

該出po嘅港媽指嗰架玩具電動車，早幾個月前係老爺奶奶買畀囝囝嘅生日禮物，佢叉足電第一次持落街俾囝囝玩，玩嘅期間都有好多家長同小朋友經過望住，但都無小朋友走埋嚟，只係遠望。但有一對經過既母子拖住小朋友行埋嚟，當時架車郁緊，所以佢就提示小心，唔好行咁貼，怕撞到嗰對母子。

然後港媽就聽到對方兒子話好想玩，就直接走去同港媽個囝囝講「畀佢玩」，囝囝即時拒絕，該小朋友聽到就扭計，喺度喊話好想玩，小朋友媽媽就再次同囝囝講「點解呀？佢好想玩呀！你借比佢玩唔得咩？」，囝囝再次拒絕，小朋友聽到就喊得更大聲，然後該家長就好大聲話「人哋唔分享都冇辦法㗎！」，港媽話好似係講埋畀佢聽咁。

港媽又指，對於認識嘅小朋友，囝囝好樂意一齊玩，唔介意借。「架車係屬於我地自己私伙嘅，就算我仔唔肯借我都唔會話佢！同你又三九唔識七！」。

網民亦留言表示支持港媽，稱「濫用分享」；有網民認為，應該先有禮貌咁問咗對方家長，然後先再問小朋友會好啲，唔好咁「老奉」：「唔關乎價值，要借人嘢玩就係咁架啦」；亦有網民戲言「叫嗰個媽媽分享佢副身家俾你嘛」、「Share個銀包先講喇」。