晨光追擊│「良駒好友」四蹄盡展

晨操動態

更新時間：15:30 2025-10-26 HKT
發佈時間：15:30 2025-10-26 HKT

由於賽事在周四上演，因此不少參戰馬於朝試跑，故此今朝晨課極之平淡，僅得幾匹馬出跳，現將操練報導過程如下。

「良駒好友」戴頭罩由助手跳兩段，四蹄盡展彈力十足，身壯呈現條線美，神態活躍火力又好，弗到不得了。「魔法速遞」戴頭罩由助手跳三段，一貫急勁，湧住去心火旺盛，身靚步開揚，馬身脹卜卜，比起上仗更弗。

星火燎原暗火展現

「星火燎原」馬身飽滿雙目有神，不遜於贏馬時。

「跑得好快」戴頭罩由助手跳兩段，谷起雞公頸而馳，火氣甚盛成隻生牯仔，論態相當不俗，但陣上演出甚飄忽。「星火燎原」拍「鑽石星空」跳兩段，同樣戴頭罩及助手試，前駒走先，拉士被追至同到，外觀靚得很，皮光肉滑馬身飽滿，暗火展現雙目有神，不遜於贏馬時，後駒追上反應好健步如飛，馬身已收好夠實淨，埋門火力不斷冒升，具備爭勝水準。

「富存寶馬」戴頭罩由助手跳兩段，比前內斂係好事，不過跳來仍欠勁度，前腳出得直欠缺屈曲性。「運來勇士」助手跳兩段，慢速完成近乎踱步，連續兩日出跳幾特別，然而神色有點淡，火氣好普通，非最佳時。

講番周六出跳馬畀大家參考。

「時尚風趣」巴度拍「風繼續吹」助手跳兩段，同樣戴頭罩，前駒直路加快衝刺好勁，火氣比前時好，馬身夠壯毛色潤澤，觀感不差，後駒年紀雖老，但跳來仍具朝氣有火有力，外觀無問題，今季最對辦一次。

「逆市奇爸」戴頭罩由助手跳兩段，中檔走返，有一股蠻勁，過終點後餘勢亦強，大馬又夠輕身，老馬狀態理想。「決一劍」戴頭罩由希威森拍伴跳馬跳兩段，輕鬆追上，整個過程充滿動感，沿途搶高頭走相當神氣，神生步爽渾身是勁，氣勢旺盛。

兆文

↓立即下載星島頭條App↓