兩美股顯長和攻守兼備 | 莫灝楠
發佈時間：17:56 2026-11-12 HKT
早排AI股災，吹起價值投資的季後風，唔少人諗起股價逆市上升的長和（0001），貪其國際業務瓣數多，系內有兩隻已經喺美股上市：和黃醫藥（HCM、0013）同埋加拿大能源公司Cenovus Energy（CVE），都可以話係新舊經濟互補、攻守因子兼備嘅投資選擇。長和持有和黃醫藥約38%；Cenovus方面，長和持有約16.4%，李氏家族信託另外持有約12.3%，合計接近三成，係最大股東陣營。
Cenovus季績破頂 再併購油砂
Cenovus啱啱11月4日公布第三季業績，數字幾靚：經營利潤（官方叫Operating Margin）63.3億加元、經調整資金流量50.2億加元，都係單季紀錄。上游日產102.35萬桶，油砂日產83.3萬桶，連續第三季創新高，公司預期全年日產會超過100萬桶。下游經營利潤較上季升近一倍至17.9億加元，季內回購15億，派息4億加元左右。油砂非燃料營運成本每桶7.80加元，連燃料約10.23加元。
油價仍然離不開霍爾木茲海峽。美伊衝突由2月28日打到而家差唔多八個半月，10月Brent平均每桶124美元，之後因停火期望跌穿100美元；11月11日早市，Brent約92.20美元、WTI約86.53美元。運輸已部分恢復，供應中斷由5月高峰每日1,090萬桶降至約254萬桶，但10月仍有37宗襲擊、11月頭亦有10宗。戰事膠著，流量回咗一部分，個油價仍然price in一定風險因素。
呢個背景下，長和系繼續透過Cenovus加碼石油資產。繼收購MEG Energy後，上月又公布以企業價值57億加元（約40億美元）收購Athabasca Oil，預計再加約4.5萬桶油當量日產，料12月完成。呢啲係Cenovus層面嘅併購，但大股東陣營等於繼續加倉加拿大油砂，反正淨負債再減，變相又有錢用來回饋股東。而加拿大原油唔使經霍爾木茲，呢點而家特別有意思，係咪即係繼續睇資源價格升？
有人會問，油會唔會短期被取代？IEA同EIA都預計2026年全球石油需求會因高油價同供應受阻而回落約200萬桶，但基數仍然超過每日1億桶，2027年又預期反彈約200萬桶。需求未必再大幅增長，但維持基本盤應該無問題。石油喺運輸、航空、化工呢行業，短時間根本無法被取代。霍爾木茲風險未解除，筆者短期仍然覺得油價會在高位運行。
和黃新藥數據佳 獲批機會高
另一邊，和黃醫藥近期亮點係索樂匹尼布（Sovleplenib）。呢隻藥先後喺10月28日同11月5日，獲美國FDA授予原發性免疫性血小板減少症（ITP）同自身免疫性溶血性貧血（AIHA）兩項孤兒藥資格，呢樣係針對用於影響人數少於20萬人的罕見疾病或狀況，美國七年市場獨佔權要等正式獲批先開始計算。而喺中國市場，ITP同溫抗體型AIHA兩項申請都已獲優先審評，目前仍在過程中；AIHA仲有突破性治療認定，但ITP今次嘅臨床數據似乎唔弱：ITP中國III期持久緩解48.4%對安慰劑0%，AIHA III期持久緩解66.0%。
市場有幾大？公司引用嘅數字有兩個口徑：按患病率推算，中國原發性ITP患者約11萬人；IQVIA則指現有患者約43萬、每年新增約4.1萬，當中約一半對現有藥物效果唔滿意。AIHA患病率約每10萬名成人17宗，當中75%至80%屬溫抗體型。暫時未見可靠嘅「未來五年平均銷售」數字。但核心產品已開始出成績，今年上半年中國銷售9,440萬美元，按年升32%。藥監局會唔會批、幾時批，仍然係最大變數；優先審評同陽性數據係加分位，過關機會都高。
元宇證券基金經理
莫灝楠
