咪再發見家鄉夢｜曾智華
更新時間：14:49 2025-08-05 HKT
發佈時間：14:49 2025-08-05 HKT
發佈時間：14:49 2025-08-05 HKT
字體大小
股市轉趨活躍，由萬四點升上兩萬五，揸咗實力股，尤其恒指中內地強勢股者，不少已見家鄉，這時，有兩個現象湧現。
網上騙子再度活躍
一為網上騙子再度活躍，幾乎所有名人個頭像都被借來行騙，小弟哎呀算有少少知名度，當然中招，煩到抽筋。僅此公告：各位，我一世都唔會介紹人買「高息股」或「蚊型股」的，若見這類網頁，必是行騙。
幾年經驗下來，報警有冇用？冇！第一，騙子多如恒河沙數，再多十萬警力都無法處理，更重要，騙徒根本可能不在香港。所以，成年人，請學懂保護自己，若因貪心或無知而中招，無法，當交學費可也。
另外一種近日大為活躍的，正是「水魚散戶」蠢蠢欲動。呢類動物特色，為蝕完又蝕都唔長進，更不會退縮，一見股市開始旺，即又心口掛個勇字衝入市，呢類傻人，凡買多即綁，十次有九次永世冇機會見家鄉。
朋友揸3隻股難見家鄉
同事「A佬」正是人辦，近日不停約飲茶，要求問幾隻股點睇。俾佢煩到暈，推無可推，見一次啦。
「碌sir，我揸咗三隻股，長年沉底，想知今次升浪，有冇機會升返家鄉位呢？」我一睇，百分百死得，只好嚴肅直講：「A佬，真係要坦白，無謂誤導你。你老哥揸的三隻股，雖然招牌人人都識，甚或大部分人幫襯過，但……斬纜啦，我肯定你一世都唔會見家鄉㗎嘞，死咗條心把啦。」
A佬頭耷耷哀鳴：「其實，我全部在佢最高位跌咗一半時才買入㗎，諗住有機會反彈，就算死，都唔會渣都冇吖，點知……」
各位，A佬買咗邊三隻呢？
（一）翠華餐廳集團（1314），歷史高位接近6元，A佬3元買入，如今跌破2毫子。
（二）佳寧娜集團（126），歷史高位接近4元，A佬2元買入，如今？跌剩1毫2，更罕有成交。
（三）莎莎國際（178），歷史高位9元3角，A佬4元6角入，如今只剩6毫1仙。
點解幾隻股跌得咁慘？唔好問我。我只肯定A佬將一世無法再見家鄉，唔忍痛斬纜，盞日日抌心肺。
資深傳媒人 曾智華
