伍富橋千金老婆梁兆楹受訪談婚姻淚如雨下 為結婚「淨身出戶」坦然接受批評：要反思
發佈時間：14:16 2025-06-17 HKT
伍富橋（Alvin）與億萬千金老婆梁兆楹（Shirely）自結婚以來，一直備受網民批評，梁兆楹多次被網民狠批「肥」、「醜」，更曾經出post反擊網民「佢X得落係佢本事，你恨唔X到咁多」，引起全網熱議。作為一名圈外人，梁兆楹近日登上ViuTV《晚吹- 怨女俱樂部》接受訪問，她在鏡頭前被問到與老公伍富橋的婚姻、家庭背景等。而在伍富橋老婆梁兆楹的訪問播出後，不少網民都留言表示支持梁兆楹，直言她只是圈外人卻為老公上電視平反，絕對是「好愛佢老公」。
梁兆楹被批評外型：原罪都係因為錢
梁兆楹在節目中接受余迪偉訪問，她在訪問首段被問到，對網民的批評有甚麼看法。她說：「結個婚啫 ，又人生攻擊，又食軟飯，做咩啫依家？我係一個素人，我嫁咗俾一個，佢又唔係天王巨星，又唔係特別出色，佢又唔係特別出名，可能我家底可能係比佢好啲，咁你要攻擊佢食軟飯。」梁兆楹老公伍富橋多次遭網民批評食軟飯，她曾不憤並出post反擊，「嗰時係啱啱結婚嘅時候，唔識處理呢啲嘢。」
梁兆楹認為「結婚係一種衝動嚟」，但她與伍富橋的婚姻卻遇到重重障礙，甚至被網民惡意批評，「啱啱結婚，有啲comment就話（我）抬上山可以食幾日，通常都係攻擊醜啊，肥啊嗰啲，咁我又唔係做幕前，你攻擊我托X啊？」但後來她慢慢想通，「其實原罪都係因為錢啫，萬惡嘅金錢大家都鍾意嘅，我都鍾意，咁所以我接受囉。」
梁兆楹伍富橋婚前婚後財政獨立
對於老公伍富橋被指食軟飯，主持問到梁兆楹二人的日常開支及資產如何處理，她說：「我哋有傾過簽婚前協議，臨尾我哋知其實呢樣嘢冇咩用，我記得我係喺佢面前，將我所有嘅嘢畀晒我阿媽，即係淨身出戶。」梁兆楹指當時伍富橋對她的決定表示「好啊，照結（婚）囉」。
梁兆楹指她與伍富橋婚前婚後均財政獨立，「我哋兩個係冇聯名戶口，佢亦從來冇要求過，我冇佢附屬卡，佢冇我附屬卡，我哋大家財政係非常獨立。」但梁兆楹笑言她曾經向伍富橋說過一番話：「嗰次我生日正日，好記得，咁就book晒所有嘢，我哋去馬爾代夫。我喺個沙灘邊問佢，我話，其實我覺得，我想認真同你傾吓偈。我話，你不如反思吓你自己，會唔會畀人一個感覺就係，你會唔會都畀人一種唔知做緊乜嘅感覺。」
伍富橋堅持做歌手 梁兆楹：我係感動
梁兆楹續說：「一個人去到呢個年紀，唔係淨係去睇comment，然後去不憤，有啲comment係你要去接受，你要去反思，我係100%支持你。我畀你嘅底氣就係，就算你依家甩晒佢（指幕前身份），重新開始，我都會陪住你重新開始。」其後主持問梁兆楹「甩晒咩？」她回答：「譬如你退出幕前啊，我叫佢好好諗吓，唔使依家答覆我，因為係佢嘅人生大事。」梁兆楹續說：「隔咗一日佢就同我講，我都係想做呢一行，因為呢個係我嘅夢想，嗰吓我係感動。」
梁兆楹自責令伍富橋遭人誤會
對於伍富橋仍然想在幕前發展，仍然想成為歌手，梁兆楹至今仍非常支持，到訪問尾段，梁兆楹面向鏡頭向老公說：「我一路以來都有一個心結，我係覺得你娶咗我之後，做咩都好似好難咁，即係你付出嘅努力可能係人哋嘅120倍，但係永遠啲人淨係會見到我去幫你，呢個係我覺得最對你唔住嘅一樣嘢。」
