張繼聰不滿賀歲片被鬧割席留言 不認同地圖炮方式批評：學下點樣去睇一套戲

今個新年主要有三部賀歲片，分別是《臨時決鬥》、《祥賭必贏》及《麻雀女王追男仔》，但整體票房都未算理想，日前（4日），就有一個電影評論平台「港唔斷戲」發文批評今年的香港賀歲片，惹得有份參演的張繼聰親自拍片回應。

張繼聰罕為批評留言反擊

「港唔斷戲」的影評人發文批評指：「今年嘅香港賀歲片，票房差係合理......我自己只係睇咗三套入面嘅0.7套，純粹諗住應下節，但最後都要睇到我中途離場，真係差同尷尬到睇唔曬......新年流流都要人發火，唔尊重觀眾，觀眾最後都係會離棄你。」結果惹來參演賀歲片《祥賭必贏》的張繼聰留言：「今次係我最後一次睇你嘅page。」

相關閱讀：《祥賭必贏》累積票房衝破400萬 謝安琪獲阿Sa教路挽「十三張」化身女賭神 岑珈其爆笑演盲人賭徒超搶鏡

張繼聰為批評留言反擊惹爭議：

「港唔斷戲」的影評人發文續指：「要搞返好香港電影，就係越爛嘅牌，就要越用心打，打爭氣波，但而家好似就係背道而馳，賀歲檔唔再係／唔應該係粗製濫造用嚟吸錢嘅工具，有麝自然香，拍得好就死都幫你推返生，要相信新時代觀眾嘅慧眼，差嘅就擺乜檔期都係曇花一現，搵咩人宣傳，都係死路一條。2025年對香港電影同戲院，都應該係艱難嘅一年，共勉」。

張繼聰的行為網民反應兩極

有份參演賀歲片《祥賭必贏》的張繼聰就留言表示：「今次係我最後一次睇你嘅page。」網民對於張繼聰的行為反應兩極，有人覺得他帶頭杯葛該專頁非常小器：「人哋評論下套戲啫，你就要咁小家」、「老實講，人哋評論下套戲啫，你就要咁小家，話最後一次睇人哋個page。唔啱睇咪過主囉。香港電影唔係盲撐嘅，一點評論都容不下，係唔會有進步㗎。」但亦有人認為該評論員：「睇左0.7套又點可以得出呢個結論？」 歐陽偉豪（Ben Sir） 亦有留言表示 ：「三套，每套都0.7套，定係三套有兩套睇晒，一套只睇0.7套？」。

其後張繼聰在社交網拍片親回事件，他解釋不用文字去交代，是怕大家看文字在理解語氣上會有誤差，所以決定拍片，親自跟大家分享他的感受。張繼聰表示電影業現正處於寒冬，並謂演員與影評人的關係相當重要：「我哋以前喺演藝學院讀書嘅時候，都有需要去受訓練點成為一個評論員，即係其中一個課題就係我哋要睇好多戲啊，要寫報告啊，學下點樣去睇一套戲啊。我覺得影評嘅重要性就好似一個導遊咁，有啲朋友未接觸到部電影嘅本身，或者接觸到個電影嘅一啲宣傳嘅第一浸，我哋係需要一啲影評人去導讀，或者睇完一套戲之後去介紹下佢從咩角度切入去欣賞一套電影。」

張繼聰認為看電影是好主觀

張繼聰認為看電影是一件好主觀的事，各有品味，而作為影評人應該撇除個人喜好去評論，他更以水果來作比喻：「如果我做咗只蕉出嚟，你一開波你就好鍾意蘋果嘅，咁咁唔使講啦，即係因為你係根本上係唔鍾意蕉㗎嘛。咁但係如果你透過即係你可以解拆畀所有觀眾聽下，呢個人做咗只蕉出嚟，佢點解做一隻蕉出嚟，點解係咁樣嘅呢，佢過程係咁樣做㗎喎，即係原來佢係佢選擇咗咁樣，我到最後只蕉係肥美啊定係有少少爛喎。如果你講到過程出嚟呢，我係最開心嘅，即係其實我有時我恨都恨睇到一啲咁樣嘅一啲影評。」

張繼續亦有解釋為何會這樣留言︰「如果一次地圖炮，好似令到有好多憤怒觀眾會留下一啲比較負面嘅睇法，好似全部戲都唔值得睇……點解會引申到去大家有呢個情緒，都係有前因後果嘅。呢一刻，呢一代仲努力緊嘅電影人都要繼續做落嚟，如果你真係支持我哋香港電影，我覺得唔淨係讚或者彈。」

有網民指張繼聰不接受批評

有網民指張繼聰不接受批評，他則解釋：「其實呢十幾廿年，我接受嘅批評合理嘅無理嘅，我諗都超乎常人㗎啦，咁所以我點會唔接受批評呢？我亦都覺得即係批評好重要，即係唔好講批評啦，睇法好重要。有陣時我畀錢我都要去進修，我都要去學點樣可以好啲，咁所以絕對唔係小氣，絕對唔係唔接受批評囉。」

「港唔斷戲」專頁稱失言為事件道歉

而在張繼聰拍片回應後，「港唔斷戲」專頁昨日在社交網留言道歉，並表示：「首先，向大家誠懇地道一個歉，係我失言，責任在我身上。本來只係想就今年香港賀歲電影較為慘淡嘅情況講一啲個人意見，『港唔斷戲』嘅宗旨一向都係想支持香港電影，但重點在於支持香港嘅『好』電影……評論嘅本質係無可能討好所有人，討好別人亦唔係評論嘅意義。再一次致歉，但睇賀歲電影提早離場亦係事實，不過套戲唔係《祥賭必贏》，如果令聰哥或者其他人有誤會，我再一次道歉。」他續指好多人執著他對其他未睇過的賀歲電影作評價，「再次強調我係武斷失言，但我對今年賀歲電影嘅壞印象係在於佢哋嘅宣傳，當中包括預告或其他形形色色嘅宣傳，連作品最有機會吸引到觀眾嘅嘢都只係咁嘅水平（再戴頭盔，可能大家覺得精彩），所以我先會一時武斷。因為電影宣傳同電影質素係可以毫無關係的，我唔應該比大家一個感覺係直接地圖炮曬所有香港賀歲片，只簡單講幾套戲都吸引唔到我就好了。」

未幾他再分享了一張《祥賭必贏》的戲飛照，並表示：「失言係自己問題，真係地圖炮咗其他我未睇嘅電影，但電影好唔好就係另一回事，讚鬧都係睇返作品嘅質素，入場！ #祥賭必贏」有網民就不滿版主無立場咁快「跪低」，並紛紛留言炮轟他：「即係你睇既嘅0.7套港產賀歲片，是另外兩套《臨時決鬥》和《麻雀女王追男仔》其中之一，作為影評人點解唔直接講」、「下次睇晒先評論啦」、「你唔係不嬲都好串好有個性架咩居然要跪」等等。