J2患癌主持文頌男完成化療 撰千字文交代病況：活得好冇尊嚴
發佈時間：19:04 2024-03-27
J2主持文頌男去年12月自揭患罕見的尤文氏肉瘤（Ewing's Sarcoma），需要停工休養。日前文頌男終於再度亮相《不正常愛情研究所》，不過原來也可能是他最後一次錄影該節目。文頌男今日再在IG撰寫長文，透露已經完成第一階段治療，可惜經歷五次化療後，腫瘤不但未有縮小，還反而變大。
相關閱讀：J2患癌主持再現幕前！身形消瘦依然活躍 食嗎啡試忍痛試鏡扮正常
文頌男化療後情況如何？
文頌男化療後腫瘤反變大
文頌男今日在IG貼出身穿病人服，坐在醫院內的光照片，相中見他沒精打采，似乎憂心忡忡。文頌男撰寫千字長文，講亦第一階段治療的結果：「做咗五次嘅化療，但係治療無效。照咗磁力共振，發現個腫瘤唔單止冇縮細，仲變大咗少少。」文頌男直言每次化療就像經歷生死：「體上好難受好辛苦，而且所有毛髮都甩晒，個樣好似妖怪咁，到後期仲開始痛返。我真係覺得好無奈，好似咁辛苦但係完全冇意義。」文頌男透露醫生對他說腫瘤變大：「最後一次化療都唔好做喇，準備做電療啦。」當時心情猶如跌入深淵。
文頌男自揭排泄出問題
文頌男對病情亦感到非常擔憂：「我真係好驚，感覺距離死亡又近咗一步，而且可能唔係死咁簡單，係會死得好痛苦。」他表示下肢、盤骨附近位置越來越痛，連嗎啡亦無法舒緩，身體更會不自主抽搐，某些部位變得麻木，就連排泄出問題：「開始有種感覺係『我活得好冇尊嚴』，因為行動不便、痛，每日都係喺屋企對住四埲牆，幾乎零社交、零工作，每日都活得好似好無意義咁。我成日都好驚，好驚可能臨死前會半身不遂、全身插滿喉管、無時無刻都伴隨住巨大嘅痛楚、意識唔清醒又表達唔到自己。」言語間充滿不安。
文頌男患癌過程：
經歷過不少辛酸的文頌男慨嘆道：「喺我以為終於生活可以穩定啲嘅時候，又畀咗呢一個難關我，而今次我覺得我真係控制唔到，冇辦法靠自己去解決。就算我想放棄，但其實根本唔知可以點放棄。」更表示現在病到每日度日如年：「唔知幾時可以開始電療、幾時先可以舒緩到我嘅痛楚，我只係盼望可以快啲唔痛。我真係覺得好攰、好攰、真係好攰。」
相關閱讀：J2文頌男自揭坎坷命運被父親拋棄變街童 患罕見癌症心酸哭訴：好慘
文頌男仍樂觀對抗癌魔
不過文頌男依然樂觀對抗癌魔：「我仍然好努力對抗呢個病，即使幾唔想食嘢，都逼自己食；即使幾痛都好，都逼自己要郁吓，唔好畀啲肌肉退化得咁勁。」更決定活在當下，享受現時仍然擁有的一切：「呢段時間雖然我喊好多，但喺可以笑嘅時候，我放聲笑；想講咩嘅時候，盡情去講，唔會再收收埋埋，因為有啲嘢，而家唔做，以後唔知仲有冇機會做。」
不少網民都留言為文頌男打氣，文頌男亦統一回覆：「好多謝大家嘅留言，我全部都有睇曬。我一路睇一路喊，覺得好感動。真係好多謝大家嘅鼓勵，我估唔到咁多人都愛我、支持我。雖然大家嘅言語幫助唔到我肉體上嘅問題，但係都會化成我心入面嘅動力。多謝大家！」希望文頌男能夠成功戰勝癌魔，早日康服，回歸幕前演出！
其他文章：
J2患癌主持文頌男自揭變「無眉男」 本周最後一次化療精神轉差：感覺就嚟死
J2主持文頌男患癌丨直擊疑似瞓走廊3日化療過程 苦呻副作用極難頂：仲有五次
J2主持文頌男患癌丨半年前腰痛揭發患罕見癌症 自爆曾陷情緒抑鬱萌輕生念頭
J2主持文頌男確診癌症！停工兩個月眾籌醫藥費 椎間近盤骨生6厘米惡性腫瘤
J2主持文頌男患癌丨嚴寒覆診跪足三個鐘 公開病歷報告自揭病況突轉差
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgY
