頭條獨家丨李丞責提醒要大掃除迎新春教你風水擺設趨吉避凶

即時娛樂

更新時間：21:00 2022-01-27 HKT
發佈時間：21:00 2022-01-27 HKT

早前著名玄學家李丞責博士為本報讀者預測虎年整體同12生肖運程，今次就同大家講吓大掃除要點做，仲畀埋風水擺設小貼士助大家趨吉避凶！李博士又特別提點虎年不同之處：「老虎最緊要果斷性同坐言起行。」叫大家今年記住呢個座右銘。採訪：秦詠姿

李博士都知都市人未必記得年年要大掃除，不過想有運行就要落啲心機，「大掃除時用柚葉、柏葉、黃皮葉，3種都係辟邪嘅葉。另外香茅、檸檬葉、橄欖葉都有幫助，大掃除之餘，順帶灑吓呢啲葉嘅水，希望淨化重生，將屋內污氣驅除。能夠點吓沉香、檀香，薰吓間屋就更好。」大掃除最好當然係擇日做，但年廿八都係個去除污垢嘅好日子。

李博士話想新一年好運啲，不妨落啲心機大掃除！

中宮位忌擺郁動嘢

虎年要睇姻緣，要留意九紫星在南邊，「南邊不妨插鮮花，一般來說有九紫星都會擺九枝花。亦可擺放鮮色物件或者粉紅晶石，長着一盞燈都可以。」至於偏財位就唔係人人有，不過都可以考慮正北嘅偏財星，可以擺水晶洞等。而正財位就喺東北，李博士提醒要小心處理：「其實可以擺流水擺設，但因為東北位同時都係太歲位，不宜郁動，等於太歲頭上動土，最好擺同太歲相合的條件，如豬形擺設，配合流水就最好，既合太歲又可生財。」而嘈吵或血光之災位在中宮位，家中正中位擺安忍水、青銅器、銅錢等可化解五黃，但切忌擺風扇等郁動嘅嘢，而紅色都會生旺土煞五黃。

立即下載 | 全新《星島頭條》APP : https://bit.ly/3yLrgYZ